Lögreglan í Staffordshire á Englandi heimilar áfram að líffræðilegir karlar sem skilgreina sig sem konur séu vistaðir í fangaklefum ætluðum konum, þrátt fyrir tímamótadóm Hæstaréttar þar í landi um skilgreiningu kyns samkvæmt jafnréttislögum, en samkvæmt dómnum skal miðað við líffræðilegt kyn, en ekki kynvitund einstaklings.
Samkvæmt reglum Staffordshire lögreglunnar mega fangar vera vistaðir í samræmi við það kyn sem þeir skilgreina sig sem. Reglurnar voru endurskoðaðar eftir dóm Hæstaréttar í apríl á síðasta ári, þar sem komist var að þeirri niðurstöðu að hugtökin kona og kyn í breskum jafnréttislögum vísi til líffræðilegs kyns.
Þrátt fyrir dóminn heldur lögreglan áfram þeirri stefnu að einstaklingar geti sjálfir gefið upp kyn sitt og að það sé skráð og virt í gögnum lögreglunnar.
Segja reglurnar stangast á við dóminn
Gögn sem Terence Stock, fyrrverandi meðlimur ráðgjafarhóps lögreglunnar, fékk afhent á grundvelli upplýsingalaga sýna að lögreglan hafi áfram skýra stefnu um sjálfsskilgreiningu kyns sem stangast á við dóm Hæstarréttar.
Í reglunum kemur annars vegar fram að karlar og konur skuli aðskilin vegna öryggissjónarmiða en hins vegar að hægt sé að vista einstakling í aðstöðu sem samræmist kynvitund hans.
Reglur um líkamsleit hafa einnig sætt gagnrýni.
Þar segir að leit þar sem kynfæri eða aðrir viðkvæmir líkamshlutar eru afhjúpaðir skuli framkvæmd af lögreglumanni af sama líffræðilega kyni og fanginn. Jafnframt kemur fram að einstaklingur sem hefur fengið fullt Gender Recognition Certificate, opinbera viðurkenningu á breyttu kyni, hafi samkvæmt lögum breytt kyni sínu.
Cathy Larkman, stjórnarmaður í Women’s Rights Network og fyrrverandi yfirlögregluþjónn, segir reglurnar ekki samræmast niðurstöðu Hæstaréttar.
„Þessar reglur eru ekki í samræmi við dóm Hæstaréttar og benda til vanþekkingar á lögunum og skeytingarleysis gagnvart réttindum kvenna sem veldur miklum áhyggjum,“ sagði Larkman.
Hún sagði reglurnar um líkamsleit setja lögreglumenn í flókna og mótsagnakennda stöðu og hvatti lögregluna til að endurskoða þær frá grunni.
Stock tók í sama streng og sagði óafsakanlegt að reglur lögreglunnar endurspegluðu ekki að fullu niðurstöðu Hæstaréttar og kröfur breskra laga um að ákveðnar leitir séu framkvæmdar af einstaklingi af sama kyni.
Hann benti jafnframt á að ítarleg líkamsleit væri meðal íþyngjandi valdheimilda lögreglu og gæti haft sérstaklega mikil áhrif á konur sem hefðu áður orðið fyrir kynferðisofbeldi eða öðrum áföllum.
Lögreglan segir öryggi tryggt
Staffordshire lögreglan hafnar því að reglurnar stofni konum eða öðrum föngum í hættu.
Talsmaður lögreglunnar sagði alla fanga vera vistaða í einstaklingsklefum með eigin salerni og vask.
Útisvæði séu aðeins notuð af einum fanga í einu og aðgangi að sturtum sé stjórnað þannig að fangar komist ekki í snertingu hver við annan.
Ákvarðanir um vistun séu teknar í hverju tilviki fyrir sig með hliðsjón af öryggi og öðrum aðstæðum.
Lögreglan segir jafnframt að ef ágreiningur sé um kyn einstaklings við líkamsleit sé leitin framkvæmd miðað við líffræðilegt kyn hans.
Það eitt að einstaklingur hafi Gender Recognition Certificate ráði því ekki sjálfkrafa hvernig líkamsleit sé framkvæmd.
„Yfirmenn endurskoða reglur okkar reglulega til að tryggja að þær séu í samræmi við lög, landsbundnar leiðbeiningar og viðeigandi dóma,“ sagði talsmaður Staffordshire lögreglunnar.
