Breska hryðjuverkalögreglan segir nú ljóst að morðið á fyrrverandi þingkonunni Ann Widdecombe hafi verið markviss fyrirfram ákveðin árás. Rannsókn stendur enn yfir á því hver hvöt árásarmannsins var en Widdecombe var þekkt fyrir íhaldssamar skoðanir sínar.
Frá árinu 1987 til 2010 sat húna á breska þinginu fyrir Íhaldsflokkinn sem þingmaður kjördæmisins Maidstone. Hún gegndi jafnframt ýmsum embættum innan stjórnar og stjórnarandstöðu, meðal annars sem skugga-innanríkisráðherra árið 1999.
Eftir að hún lét af þingmennsku árið 2010 varð hún þekkt sjónvarpspersóna og kom meðal annars fram í þáttunum Big Brother og Strictly Come Dancing á BBC.
Þrátt fyrir að hafa horfið úr hefðbundnum stjórnmálum hélt hún áfram að tjá sig opinberlega um pólitísk málefni og var, sem fyrr segir, þekkt fyrir félagslega íhaldssamar skoðanir. Árið 2019 gekk hún til liðs við Brexit-flokkinn sem barðist fyrir úrsögn Bretlands úr Evrópusambandinu. Hún sat jafnframt á Evrópuþinginu fyrir flokkinn á árunum 2019–2020.
Árið 2023 gekk hún til liðs við hægrisinnaða flokkinn Reform UK og gegndi embætti talsmanns flokksins í innflytjenda- og dómsmálum allt til dauðadags.
Widdecombe var jafnframt þekkt fyrir andstöðu sína við fóstureyðingar og fyrir að hafa verið á móti því að samræma lögaldur samþykkis fyrir samkynhneigð og gagnkynhneigð sambönd.
Hún fannst látin á heimili sínu í Dartmoor í Devon á fimmtudag. Hún hafði hlotið alvarlega höfuðáverka og talið er að hún hafi verið myrt um hádegi daginn áður.
Málið var upphaflega rannsakað af lögreglunni í Devon og Cornwall, en hefur nú verið fært yfir til bresku hryðjuverkalögreglunnar (Counter Terrorism Policing).
Grunaður handtekinn í Rotherham
28 ára breskur karlmaður var handtekinn á laugardagskvöld í Rotherham, um 480 kílómetrum frá heimili Widdecombe.
Hann var fyrst handtekinn grunaður um morð en síðar einnig vegna gruns um undirbúning eða framkvæmd hryðjuverka samkvæmt breskum hryðjuverkalögum. Dómstóll hefur heimilað að honum verði haldið í allt að sjö daga til viðbótar án ákæru á meðan rannsókn stendur yfir.
Laurence Taylor, aðstoðaryfirlögregluþjónn hjá hryðjuverkalögreglunni, sagði á blaðamannafundi að rannsókn á morðinu og mögulegum hryðjuverkabrotum færi nú fram samhliða.
„Það er ljóst að þetta var markviss árás,“ sagði Taylor og bætti við að rannsóknin væri flókin og að almenningur ætti að forðast að dreifa óstaðfestum upplýsingum.
Hætti skyndilega að svara
Á dánardeginum hafði Widdecombe tekið þátt í útvarpsviðtali þar sem hún varði Nigel Farage vegna umdeildrar 5 milljóna punda gjafar sem hann hefur sagt ætlaða til öryggismála.
Síðar sama dag átti hún að koma fram í beinni útsendingu á Channel 5, en hætti skyndilega að svara skilaboðum framleiðenda þáttarins.
Þegar hún mætti hvorki í Zoom-viðtal né svaraði símtölum jukust áhyggjur samstarfsfólks hennar. Umboðsmaður hennar var beðinn um að kanna með hana og lögreglu var síðar gert viðvart.
Lík hennar fannst ekki fyrr en um klukkan 11:40 morguninn eftir, tæpum sólarhring eftir að talið er að hún hafi verið myrt.
Rannsaka hvort stjórnmálaskoðanir hafi verið hvötin
Taylor vildi ekki staðfesta hvort lögregla teldi að fleiri stjórnmálamenn gætu hafa verið skotmörk, en sagði að sú rannsóknarlína væri meðal þess sem verið væri að kanna.
Lögregla vinnur nú meðal annars að umfangsmiklum rannsóknum á rafrænum gögnum og leitast við að meta hversu mikill undirbúningur hafi legið að baki árásinni.
Samkvæmt breskum fjölmiðlum fundust gögn tengd bæði rússneskum málefnum og kommúnisma í raftækjum hins grunaða. Lögregla hefur þó ekki staðfest þær upplýsingar opinberlega og segir rannsókn á pólitískum skoðunum hans enn á frumstigi.
Innanríkisráðherrann Shabana Mahmood sagði jafnframt að hinn grunaði hefði ekki áður komið við sögu í forvarnarverkefninu Prevent, sem fylgist með einstaklingum í hættu á að leiðast út í ofbeldisfulla öfgastefnu.
Fyrri handtekinn maður hreinsaður af grun
Lögregla hafði áður handtekið annan mann í nágrenni heimilis Widdecombe vegna málsins, en honum hefur síðan verið sleppt án frekari aðgerða.
Rannsókn heldur áfram og segja yfirvöld að fjölmargar rannsóknarlínur séu enn opnar, þar á meðal hvort pólitískar skoðanir eða önnur hugmyndafræðileg hvöt hafi legið að baki árásinni.
Í klippunni hér að neðan má meðal annars sjá viðtalið sem lögregla telur að Widdecombe hafi veitt skömmu áður en hún var myrt.
