Ung kona sem kom til Mallorca með loforð um vinnu á japönskum veitingastað var samkvæmt lögreglu neydd í vændi af manni sem hún hafði þekkt frá því hún var barn. Maðurinn var vinur fjölskyldu hennar og er sagður hafa nýtt sér að hún var ein í ókunnu landi og þurfti á peningum að halda.
Lögreglan í Palma hefur handtekið manninn og sambýliskonu hans vegna gruns um mansal og aðild að skipulögðum brotasamtökum. Handtökurnar fóru fram síðastliðinn þriðjudag eftir margra mánaða rannsókn. Europa Press greinir frá málinu.
Lofaði tekjum til að hjálpa fjölskyldunni
Samkvæmt lögreglu sá maðurinn um ferðaskjöl konunnar og greiddi ferð hennar til Mallorca þegar hún varð átján ára. Hann lofaði henni vinnu á japönskum veitingastað þar sem hún gæti bæði greitt ferðakostnaðinn til baka og aflað tekna til að aðstoða fjölskyldu sína.
Þegar hún kom til eyjarinnar tók hins vegar annað við. Lögregla segir manninn hafa notfært sér ungan aldur hennar, fjárhagslega stöðu og einangrun til að þvinga hana til að veita kynlífsþjónustu gegn greiðslu.
Hótaði að segja fjölskyldunni
Þegar konan neitaði er maðurinn sagður hafa hótað að segja fjölskyldu hennar að hún stundaði vændi. Að sögn lögreglu var tilgangurinn að niðurlægja hana og þrýsta á hana að hlýða.
Konan sagði lögreglu að fleiri kæmu að starfseminni. Ein kona hefði það hlutverk að fylgjast með henni og stýra því sem hún gerði. Önnur kona, sambýliskona mannsins, sæi um að birta vændisauglýsingar og taka við símtölum frá viðskiptavinum.
Sögð hafa verið undir líkamlegri og andlegri stjórn
Lögreglan segir verkaskiptinguna hafa verið skýra og konunni haldið undir víðtækri líkamlegri og andlegri stjórn. Hinir grunuðu hafi jafnframt reynt að forðast að skilja eftir rafræn spor á netinu og í skilaboðaforritum.
Maðurinn er einnig grunaður um hótanir. Konunni hefur nú verið komið á öruggan stað með aðstoð hjálparsamtaka og veittur sálfræðilegur stuðningur.
