Þorvaldur Gylfason, prófessor emeritus í hagfræði við Háskóla Íslands, líkir Donald Trump Bandaríkjaforseta við Adolf Hitler í færslu á Facebook. Þar ber hann saman morð nasista á þýskum hershöfðingja og eiginkonu hans við ákvörðun ríkisstjórnar Trumps um að fella niður öryggisgæslu Mark Milley hershöfðingja.
Þorvaldur dregur jafnframt íslenska stjórnmálaflokka inn í málið. Hann segir tvo flokka á Alþingi hafa sótt fundi hjá repúblikönum og þegið ráð frá þeim.
Ber saman við morð árið 1934
Þorvaldur rifjar upp að Kurt von Schleicher hershöfðingi og eiginkona hans hafi verið myrt árið 1934, um ári eftir að Hitler komst til valda. Hann lýsir því sem aðgerð sem hafi verið framkvæmd „eins og til að prófa hvort herinn þyrði að hreyfa andmælum“.
„Herinn þagði,“ skrifar Þorvaldur.
Schleicher var síðasti kanslari Þýskalands áður en Hitler tók við. Hann og eiginkona hans voru myrt 30. júní 1934 í hreinsunum nasista sem kenndar eru við nótt hinna löngu hnífa.
Öryggisgæsla felld niður þrátt fyrir hótanir
Þorvaldur ber þetta saman við afnám öryggisgæslu Milleys eftir að Trump tók aftur við forsetaembættinu í fyrra. Hann segir Milley hafa sætt ítrekuðum morðhótunum frá Íran og lýsir ákvörðuninni með þessum orðum:
„… eins og til að kanna hvort repúblikanar þyrðu að hreyfa andmælum.“
Afnám gæslunnar var tilkynnt 28. janúar 2025 að ákvörðun Pete Hegseth varnarmálaráðherra. Milley, sem var æðsti herforingi Bandaríkjanna á árunum 2019 til 2023, hafði fengið gæslu vegna hótana frá Íran í kjölfar þess að Bandaríkin drápu íranska hershöfðingjann Qasem Soleimani árið 2020.
Vísar til tveggja flokka á Alþingi
Þorvaldur heldur því fram að repúblikanar hafi látið ákvörðunina afskiptalausa.
„Repúblikanar þögðu og þegja enn,“ skrifar hann.
Hann nefnir íslensku flokkana ekki á nafn en lýkur færslunni á þessum orðum:
„Tveir flokkar á Alþingi hafa sótt fundi hjá repúblikönum og þegið ráð af þeim.“
