Óveðrið sem geisar á miðvikudag skellur á um klukkan sex að morgni og gengur ekki niður að fullu fyrr en um klukkan sex næsta dag.
Veðurstofan hefur gefið út gular viðvaranir í flestum landshlutum vegna veðursins. Versta veðrinu er spáð á Vestfjörðum, Ströndum og Norðurlandi vestra. Þar hafa verið gefnar út appelsínugular viðvaranir þegar veðrið verður í mestum ham.
Áfram verður fylgst með þróun veðursins. Viðbúið er að fleiri viðvaranir bætist við þegar líður á daginn eða á morgun.
Viðvörunin á Vestfjörðum gildir frá fimm síðdegis á miðvikudag til tvö eftir miðnætti aðfaranótt fimmtudags og viðvörunin á Ströndum og Norðurlandi vestra frá átta að kvöldi miðvikudags til klukkan fimm að morgni fimmtudags. Ekkert ferðaveður verður meðan á þessu stendur.
Gular viðvaranir hafa verið gefnar út á stærstum hluta landsins, að höfuðborgarsvæðinu, Norðurlandi eystra, Austurlandi og Austfjörðum undanskildum, vegna norðaustan storms og hríðar.
Óveðrið gengur yfir landið á misjöfnum tímum. Það byrjar á sunnanverðu landinu og færist síðan vestur og norður. Syðst gengur veðrið niður um og upp úr hádegi en annars staðar um kvöldið og nóttina. Undir morgun verður síðasta viðvörunin aðeins í gildi á miðhálendinu.
