Skipulagsráð á Akureyri hefur samþykkt að húsnæði BSO, Bifreiðastöðvar Oddeyrar, verði afhent Jólagarðinum í Eyjafjarðarsveit án endurgjalds. Sex óskuðu eftir að fá húsið eftir að bærinn auglýsti eftir áhugasömum um að flytja og varðveita húsið.
Leigubílastöðin var auglýst gefins gegn því að vera sótt, eftir að bærinn hafði betur í langdreginni deilu um lóðina við Hofsbót.
Eða með öðrum orðum; húsið yrði afhent án endurgjalds en flutningur væri á ábyrgð viðtakanda.
Samkomulag náðist eftir langdregna deilu milli BSO og Akureyrarbæjar um að leigubílastöðin færi brott af lóðinni gegn því að bærinn greiddi þeim leigu um nokkurra mánaða skeið.
Bærinn óskaði svo eftir tilboðum frá aðilum sem hefðu áhuga á að varðveita húsið á nýjum stað og bárust sex umsóknir. Dómnefnd á vegum bæjarins, skipuð bæjarstjóra, aðstoðarmanni bæjarstjóra og bæjarlögmanni gaf Jólagarðinum þar níu af tíu mögulegum.
Þurfa að koma BSO burt fyrir 15. júní
Benedikt Ingi Grétarsson, eigandi Jólagarðsins, var á fullu að baka fyrir þrjátíu ára afmæli fyrirtækisins þegar fréttastofa náði tali af honum. Margt ætti eftir að skipuleggja í sambandi við flutning hússins, en hann segist vona að húsið auki aðdráttarafl staðarins sem þegar sé farinn að gera út á meira en bara jólin.
„Þetta verður hvellur bara eftir helgi, þá þarf maður að leita til sérfræðinga til þess að, fá húsið flutt og svo hefst bara það ferli, í sambandi við skipulag, byggingarfulltrúa og svona, að fá það niðursett þar sem við viljum fá það niður“, segir Benedikt.
Hann segir ekki standa til að breyta leigubílastöðinni í jólahús, hana eigi að varðveita og nýta á einhvern skemmtilegan máta.
„Við erum bara að reyna að búa til meira gaman, það er bara markmið númer eitt, tvö og þrjú, það er að hafa gaman.“
