Verk með fjölda teikninga af kynfærum og kynferðislegum athöfnum í Álftamýrarskóla vakti athygli kjósenda sem mættu á kjörstað í skólanum um helgina.
Verkið hangir á vegg í skólanum þar sem fólk gekk fram hjá á leið sinni að kjörklefum. Margir sem höfðu samband við Nútímann sögðust hafa verið mjög hissa á að sjá slíkar myndir inni í grunnskóla.
Á myndunum má meðal annars sjá getnaðarlimi í fullri reisn að hafa sáðlát í lófa eða út í loftið, teikningar af kynfærum í nærmynd, myndir þar sem fingrum er stungið inn í leggöng og einnig mynd þar sem gervilim er stungið inn í leggöng. Við myndirnar stendur „Hugsum jákvætt, verum hugrökk“ og „Gleði, ást.“
Skólastjóri staðfestir að verkið hafi verið gert í Viku 6
Í samtali við Nútímann staðfesti Hanna Guðbjörg Birgisdóttir skólastjóri Álftamýrarskóla að verkið hefði verið unnið í tengslum við Viku 6, sem að hennar sögn er verkefnavika tengd kynfræðslu og kynheilbrigði.
„Vika 6 er bara í raun og veru verkefnavika sem er stýrt frá skóla- og frístundasviði og allir grunnskólar taka þátt hver með sínum hætti með ákveðnum verkefnabanka sem kemur sem hugmyndabanki,“ sagði Hanna.
Hún sagði að verkefnið hefði verið unnið af nemendum í áttunda til tíunda bekk og að það hefði verið sett upp í vetur.
„Við ákváðum að fara þessa leið og krakkarnir völdu sér í raun og veru að búa til þetta listaverk sem prýðir núna unglingadeild skólans,“ sagði hún.
Segir enga nemendur hafa verið neydda til þátttöku
Nútíminn hafði fengið upplýsingar frá aðila sem sagðist hafa tekið þátt í verkefninu og hélt því fram að sumir nemendur hefðu ekki verið sérstaklega viljugir til þátttöku.
Hanna hafnaði því alfarið í samtalinu.
„Það var enginn píndur til þess að vinna þetta og engar viðurkenningar veittar fyrir þessa þátttöku,“ sagði hún.
Síðar í viðtalinu ítrekaði hún þetta enn frekar.
„Listaverk eiga náttúrulega að vera svolítið til þess að ögra og greinilega hefur þetta kveikt í einhverjum“
„Það var enginn píndur til að taka þátt í þessu. Það sést mjög vel á verkunum að allir eru að vanda sig og gera þetta virkilega vel. Þannig að það var enginn píndur hér. Ekki nokkur einasti maður,“ sagði Hanna.
Þá sagði hún jafnframt að ef einhver nemandi hefði ekki viljað taka þátt hefði sá hinn sami einfaldlega getað hafnað því.
„Ef sá nemandi er að segja að hann hafi ekki verið mjög viljugur að taka þátt í þessu, þá hefði hann bara getað sagt ‚nei takk‘,“ sagði hún.
„Listaverk eiga náttúrulega að vera svolítið til þess að ögra“
Þegar blaðamaður spurði hvort skólanum þætti ekkert athugavert við að hafa myndir af kynfærum og kynferðislegum athöfnum þar sem verið væri að troða fingrum og hlutum upp í leggöng, uppi á veggjum skólans sagði Hanna að fólk ætti kannski að skoða verkið sjálft áður en það dæmdi það.
„Það er nú ekki alveg þannig. Þú ættir kannski bara að koma og kíkja á þetta listaverk,“ sagði hún.
Hún bætti síðan við að eitt af hlutverkum listar væri einmitt að ögra fólki.
„Svona sjá unglingar í dag kynfæri og það er kannski bara hið besta mál að þau séu ekki að horfa á þau af einhverjum tepruskap eins og fyrri kynslóðir“
„Listaverk eiga náttúrulega að vera svolítið til þess að ögra og greinilega hefur þetta kveikt í einhverjum,“ sagði Hanna.
Segir eldri kynslóðir geta lært af viðhorfum unglinga
Í viðtalinu sagði Hanna einnig að kynfæri væru ekki sama tabú meðal unglinga í dag og áður fyrr og að eldri kynslóðir gætu jafnvel lært af því.
„Svona sjá unglingar í dag kynfæri,“ sagði hún þegar blaðamaður spurði út í myndirnar.
Hún sagði jafnframt að henni þætti jákvætt að ungmenni þyrftu ekki að nálgast umræðu um kynfæri af sama tepruskap og eldri kynslóðir hefðu oft gert.
„Svona sjá unglingar í dag kynfæri og það er kannski bara hið besta mál að þau séu ekki að horfa á þau af einhverjum tepruskap eins og fyrri kynslóðir,“ sagði hún.
Hún sagði einnig að nemendur skólans væru stoltir af verkinu.
„Unglingarnir í okkar skóla eru mjög stoltir af þessu listaverki sínu og það er virkilega fallega uppsett,“ sagði Hanna.
Samkvæmt upplýsingum á vef Reykjavíkurborgar eru verkefnastýrur Viku 6 þær Indíana Rós Ægisdóttir og Maríanna Guðbergsdóttir.
Nútíminn reyndi að ná tali af þeim við vinnslu fréttarinnar en það tókst ekki áður en fréttin fór í loftið.
UPPFÆRT: Þegar Nútíminn reyndi að birta fréttamyndina í sinni upprunalegu mynd þá leyfðu samfélagsmiðlar ekki birtingu myndarinnar fyrr en búið var að minnka hana.
