Þrettán ára Garðbæingur ver frítíma sínum í að læra kínversku, stunda ýmsar kínverskar listir og kynnir Ísland fyrir Kínverjum.
Og allt hófst þetta með teiknimyndum um hnellinn pandabjörn sem iðkar bardagalistir.
„Þegar ég var lítill, fyrir svona 7 árum, horfði ég á Kung Fu Panda. Þá fannst mér kínverska mjög flott, ég vildi líka læra Kung fu. Þá spurði ég foreldra mína hvort ég mætti læra það. Og ég fór að læra kínversku og kung fu,“ segir Leon Alexander Sebastiansson 13 ára, sem hefur lagt stund á kínversku síðan hann var á sjötta ári.
Nú fer stór hluti frítíma Leons í að læra mandarín-kínversku, fræðast um Kína og leggja stund á ýmsar kínverskar listir.
Meðal annars hina aldagömlu andlitsskiptalist, sem á rætur sínar að rekja til óperunnar í Sichuan-héraði.
Í henni felst m.a. að listamaðurinn skiptir um andlitsgrímur af ýmsum gerðum með hröðum hreyfingum á örskotsstundu.
Grímunum hefur fjölgað ár frá ári
Leon hefur lagt stund á andlitsskiptalistina í þrjú ár. „Í byrjun hafði ég fjórar grímur, næsta ár hafði ég átta og núna hef ég 13.“
Hvað er hægt að vera með margar grímur í þessari list? „Mesta sem ég hef talið eru 16 grímur.“
Stefnir þú á það? „Já, mig langar að læra meira, nota fleiri grímur. Kannski setja kung fu og andlitsskiptilistina saman.“
Búa til nýja listgrein? „Já, það er líka mögulegt.“
Spilar kínversk lög og skrifar barnabók
Leon hefur líka lært á kínverska flautu sem er gerð úr bambus og spilar gjarnan og syngur kínversk lög. „Ég byrjaði líka að mála í kínverskum stíl,“ segir hann um listiðkun sína.
Þessu til viðbótar situr Leon við skriftir og vinnur að barnabók um lunda sem á að koma út á kínversku. „Ég er að teikna myndirnar og allt.“
Lærði kínversku í gegnum leik
Leon segir að kínverska hafi reynst fremur erfið í byrjun. „Út af því hún hefur tóna og ef maður segir tóna rangt, þá getur það þýtt allt annað orð. En núna finnst mér þetta miklu léttara.“
Hongling Song, kínverskukennari Leons, segir að hann sé yngsti nemandinn sem hún hafi kennt. „Ég talaði ekki íslensku þá,“ segir hún um upphaf kínverskunáms Leons.
„Hann skildi enga kínversku og ég hugsaði með mér: Þá skulum við fara í leiki. Við skulum skemmta okkur. Þannig hófst fyrsta kennslustundin hjá okkur.“
Nú er færni Leons í kínversku svipuð og þeirra sem útskrifast úr kínversku frá Háskóla Íslands. Síðustu ár hefur hann ferðast nokkrum sinnum til Kína, lagt þar stund á kung fu og andlitsskiptalist og farið í sumarbúðir.
Samfélagmiðlastjarna í Kína
Þessi áhugi hans á kínverskri menningu hefur vakið athygli í Kína og fjallað um hann í þarlendum fjölmiðlum.
„ Ég held að það sé margt fólk í Kína sem finnst áhugavert að ég, sem er krakki, kann kínversku og vill sýna öðru fólki hvað Kína er gott land. Og Kínverjar elska Ísland. Ég er að kynna Ísland fyrir Kínverjum og Kína fyrir Íslendingum. “
Og hann er með marga fylgjendur á samfélagsmiðlum. „Ég held um 74.000 og það er á kínversku TikTok og Rednote,“ segir Leon.
Í ljósi þessa kemur kannski ekkert mikið á óvart hvernig Leon sér framtíð sína.
Mig langar kannski til að fara í háskóla í Kína og læra þar kínversku og allt það.
