Kristrún Frostadóttir forsætisráðherra hafnar því að hafa þrýst á Guðmund Inga Kristinsson, þáverandi mennta- og barnamálaráðherra, að segja sig frá ráðherraembætti, eins og skilaboð til Guðmundar gefa til kynna. Ákvörðunin hafi verið hans eigin, meðal annars vegna heilsufars. Hún geti þó ekki svarað fyrir samskipti hans við aðra.
Hún segir aftur á móti ekki einkamál ráðherra hvort hann sitji áfram í ríkisstjórn eða ekki. Málið hafi verið rætt en í þessu tilviki hafi Guðmundur Ingi sjálfur tekið ákvörðunina.
„En annars hefði auðvitað þessi staða sem upp var komin, meðal annars vegna heilsufars hans, ef til vill verið rædd í þingflokki eða flokksstofnunum Flokks fólksins sem hafa auðvitað endanlegt ákvörðunarvald um ráðherraskipan á vegum flokksins.“
Hægt er að hlusta á viðtalið við Kristrúnu í heild sinni í spilaranum hér að neðan.
Hart sótt að Ingu á þingi í dag
Samskipti Guðmundar Inga við aðstoðarmann sinn í aðdraganda afsagnar hans úr embætti voru mikið hitamál á þingi í dag og hart var sótt að Ingu Sæland, núverandi mennta- og barnamálaráðherra og formanni Flokks fólksins.
Guðmundur Ingi sagði í viðtali við fréttastofu RÚV í síðustu viku að sér hefði verið gert að segja af sér ráðherraembætti á sjúkrabeði. Inga Sæland hefði hringt í eiginkonu hans á þriðja degi jóla þegar hann lá inni á spítala eftir hjartaaðgerð og krafist þess að fá að hitta hann.
Guðmundur Ingi sagði í viðtali við fréttastofu RÚV í síðustu viku að sér hefði verið gert að segja af sér ráðherraembætti á sjúkrabeði. Inga Sæland hefði hringt í eiginkonu hans á þriðja degi jóla þegar hann lá inni á spítala eftir hjartaaðgerð og krafist þess að fá að hitta hann.
Inga sagði í kjölfarið að Guðmundur Ingi væri ekki að greina rétt frá. Upplifun hennar af aðdraganda afsagnar hans væri önnur og að ákvörðunin hefði verið hans eigin.
Tvær hliðar á öllum málum
Kristrún er stödd á allsherjarþingi Sameinuðu þjóðanna í New York og veitti fréttastofu símaviðtal á milli funda. Hún segir ávallt tvær hliðar á öllum málum en að Guðmundur Ingi hafi sjálfur tekið ákvörðun um að segja af sér með hliðsjón af heilsufari sínu á þessum tíma.
„En auðvitað segir það sig sjálft að svona ákvörðun er ekki tekin í tómarúmi. Hann er bæði hluti af stjórnmálaflokki og svo auðvitað á þeim tíma situr hann sem ráðherra í skjóli þingmeirihluta þannig að svona hlutir eru eðlilega ræddir. En þetta var rétt ákvörðun hjá honum,“ segir Kristrún.
Guðmundur beri ábyrgð á afsögninni
En þetta kemur fram í þessum skilaboðum að ákvörðunin sé, eins og það er orðað, „valkyrjanna“ og þetta var áður en rætt hafði verið við Guðmund. Tókuð þið þessa ákvörðun?
Eins og ég segi þá var það Guðmundur Ingi sem tók þessa ákvörðun og þetta var rétt ákvörðun. Svona mál eru auðvitað rædd en þetta er á hans ábyrgð og það er endanlega hann sem tekur þessa ákvörðun að segja af sér á sínum tíma.
Var þrýst á hann að segja af sér?
Nei. Ég get auðvitað ekki svarað fyrir öll samskipti sem hann átti en þegar upp er staðið þá var þetta ákvörðun hans og þetta er rétt ákvörðun. En þetta er auðvitað stór ákvörðun og svona ákvörðun er tekin í samráði við flokk og formenn og hann hefur auðvitað rætt við fjölskyldu sína og svo framvegis. Þannig að það er stór ákvörðun að gera þetta en það var hann sem ber ábyrgð á henni og endanlega hann sem sagði af sér.
Ekki einkamál ráðherra hvort hann sitji áfram
En í þessum skilaboðum kemur nokkuð skýrt fram að ákvörðunin liggi þegar fyrir og hafi verið tekin og honum líður eins og honum sé stillt upp við vegg. Er það þá ekki rétt að ákvörðunin hafi verið tekin af ykkur þá og honum gefnir þessir tveir kostir?
Eins og ég segi þetta er ákvörðun sem er á hans ábyrgð. En staðreynd málsins er að það virkar auðvitað þannig að allir ráðherrar sitja í umboði sinna flokka og í skjóli þingmeirihluta og það er aldrei einkamál eða einkaákvörðun hvers ráðherra að sitja sem ráðherra eða ekki. Það er í þessu tilviki þannig að það var Guðmundur Ingi sem sagði af sér sem ráðherra en það er hann sem tekur þessa ákvörðun á þessum tímapunkti.
Þannig að þið hittust ekki áður en hann tilkynnti um afsögn sína og ákváðuð þetta?
Við höfum rætt málin eins og ég sagði áðan. Þetta er ekki einkamál ráðherra en það er hann sem tekur þessa ákvörðun.
Sér ekki málið með sama hætti og Guðmundur Ingi
Guðmundur Ingi segir sér hafa blöskrað mjög skilaboðin frá aðstoðarkonu sinni og þótt hún komin langt út fyrir sitt verksvið. Honum hafi liðið eins og þarna væri verið að sparka í liggjandi mann.
Spurð hvort henni þyki þetta eðlileg vinnubrögð segist Kristrún átta sig á því að þetta hafi verið erfiðar aðstæður. Guðmundur Ingi hafi verið veikur á þessum tíma og erfitt að taka ákvarðanir sem þessar. Hann hafi rætt við fólk um afsögn sína. Þá hafi hún sjálf rætt við hann. „Enda var hann ráðherra í minni ríkisstjórn og ekkert óeðlilegt við það.“
Hún segir samskipti þeirra hafa verið góð hér eftir sem hingað til og að hún óski honum alls hins besta.
Þú segir að þetta sé hans ákvörðun en hann segir samt mjög skýrt að hann hafi ekki haft neitt annað val, að honum hafi bara verið settir þessir afarkostir. Er það eðlilegt og er þá eðlilegt að kalla þetta hans ákvörðun?
Ég sé þetta mál ekki með þessum hætti. Það eru tvær hliðar á þessu máli. Það er ekkert óeðlilegt við það þegar fólk er í þessari stöðu og þarf að taka stóra ákvörðun að viðkomandi ráðfæri sig við fleiri en einn aðila. Það er heldur ekki óeðlilegt að formenn í stjórnmálaflokkum sem standa að þessari ríkisstjórn séu upplýstir um hvað stendur til eða hvernig staðan er. En í lok dags er það þannig að Guðmundur Ingi sagði af sér sem ráðherra og þetta er ákvörðun sem hann tók sjálfur og þetta var rétt ákvörðun hjá honum.
