Kosið verður um þingsæti Nigels Farage, leiðtoga Umbótaflokksins, í aukakosningum í Clacton í Englandi í dag. Alls eru 34 frambjóðendur sem bítast um þingsæti Farage, þar með talið hann sjálfur.
Farage sagði af sér þingmennsku í byrjun júlí eftir að hafa sætt gagnrýni fyrir að hafa ekki skráð gjafir og annan fjárhagslegan stuðning sem hann þáði áður en hann var kjörinn á breska þingið árið 2024.
Fötufés greifi lætur til sín taka
Stærstu flokkar Bretlands neituðu að stilla upp frambjóðendum á móti Farage. Hann fékk þó óvæntan keppinaut, Fötufés greifa – Count Binface, sem er einn frambjóðendanna.
Maðurinn á bak við Fötufés greifa er breski grínistinn Jon Harvey. Hann kemur aðeins fram með gráa ruslatunnu á hausnum, íklæddur skykkju og silfraðri brynju.
Þrátt fyrir að um grínframboð sé að ræða er talið að Fötufés greifi gæti fengið allt að 20% atkvæða í kosningunum.
Farage líklegur sigurvegari kosninganna
Farage er talinn eiga sigurinn vísan en stjórnmálaskýrendur telja að útspil Farage geti veikt stöðu hans. Will Jennings, stjórnmálafræðingur við Háskólann í Southampton, segir að þó að Farage tryggi sér þingsætið á ný þá hverfi ekki vangaveltur um fjármál hans og Umbótaflokksins.
Breska ríkisútvarpið segir að 79.785 séu á kjörskrá og að kjörklefum verði lokað klukkan 22:00 í kvöld. Kjörseðillinn er nærri eins metra langur vegna fjölda frambjóðenda. Þar af leiðandi er gert ráð fyrir að talning atkvæða taki mun lengri tíma en í flestum þingkosningum og úrslit liggi fyrir í fyrramálið.
