Bresk kona, sem fæddist á Gaza og kom sjálf til Bretlands sem flóttamaður, hefur unnið mál gegn breskum stjórnvöldum vegna fjölskyldusameiningar. Niðurstaðan er sú að 18 ættingjar hennar frá Gaza fá að koma til Bretlands.
Dómstóllinn komst að þeirri niðurstöðu að það bryti gegn rétti konunnar og barna hennar til fjölskyldulífs að neita allri stórfjölskyldunni um inngöngu í landið.
Fram kemur í dómsgögnum að aðeins foreldrar konunnar geti búið hjá henni. Aðrir fjölskyldumeðlimir muni þurfa húsnæði og fjárhagsaðstoð frá hinu opinbera.
Foreldrar, systkini, makar og börn fá að koma
Konan er þriggja barna móðir og hefur nú öðlast breskan ríkisborgararétt.
Hún sótti um að fá 18 ættingja sína til Bretlands. Um er að ræða foreldra hennar, bróður hennar, eiginkonu hans og fjögur börn þeirra, systur hennar og fjögur börn hennar, auk annarrar systur, eiginmanns hennar og þriggja barna þeirra.
Breska innanríkisráðuneytið hafnaði umsókn fjölskyldunnar samkvæmt reglum um sameiningu flóttamannafjölskyldna.
„Dómstóllinn komst því að þeirri niðurstöðu að fjölskyldan myndi þurfa að reiða sig á opinbert fé eftir komuna til Bretlands“
Umsóknin var lögð fram í nóvember 2023, skömmu eftir að stríðið á Gaza hófst.
Fjölskyldan fór þá með málið fyrir dómstóla og bar fyrir sig réttinn til fjölskyldulífs samkvæmt Mannréttindasáttmála Evrópu.
Dómari taldi synjunina of íþyngjandi
Fjölskyldan vann málið fyrir fyrra dómstigi innflytjendamála í apríl á síðasta ári.
Dómarinn taldi að synjun stjórnvalda hefði svo alvarleg áhrif á konuna og þrjú börn hennar að ekki væri hægt að réttlæta hana með vísan til innflytjendaeftirlits eða almannahagsmuna.
Í úrskurðinum kemur fram að konan og börn hennar hafi glímt við andleg veikindi vegna aðstæðna ættingja þeirra á Gaza.
Dómstóllinn taldi því að hagsmunir fjölskyldunnar af sameiningu væru þyngri en hagsmunir breskra stjórnvalda af því að hafna umsókninni.
Flestir tala ekki ensku og þurfa opinbera aðstoð
Í dómsgögnunum kemur fram að flestir fullorðnu fjölskyldumeðlimirnir tali ekki ensku.
Einnig kom fram að konan í Bretlandi gæti aðeins séð foreldrum sínum fyrir húsnæði.
Dómstóllinn komst því að þeirri niðurstöðu að fjölskyldan myndi þurfa að reiða sig á opinbert fé eftir komuna til Bretlands.
Þrátt fyrir það var synjun innanríkisráðuneytisins talin brjóta gegn mannréttindalögum Bretlands.
Innanríkisráðherra tapaði áfrýjuninni
Shabana Mahmood, innanríkisráðherra Bretlands, reyndi að fá niðurstöðunni hnekkt fyrir seinna dómstigi.
Gemma Loughran dómari hafnaði hins vegar áfrýjun ráðherrans og staðfesti að allir 18 fjölskyldumeðlimirnir ættu að fá að koma til Bretlands.
Hún sagði fyrri dómara hafa komist að þeirri niðurstöðu að afleiðingar synjunarinnar fyrir konuna og börn hennar væru ómannúðlegar.
Synjunin hefði því verið óhófleg og ólögmæt samkvæmt bresku mannréttindalögunum.
Öllum fjölskyldumeðlimunum hefur verið veitt nafnleynd.
Segir úrskurðinn geta opnað flóðgáttir
Chris Philp, skugga innanríkisráðherra Íhaldsflokksins, gagnrýndi niðurstöðuna harðlega og sagði málið geta skapað fordæmi sem myndi gera þúsundum Palestínumanna kleift að krefjast inngöngu í Bretland á grundvelli mannréttindalaga.
„Hvers vegna ættu innflytjendur að geta flutt alla stórfjölskyldu sína til Bretlands?“ sagði Philp.
Hann hvatti Mahmood til að áfrýja málinu áfram til hæstaréttar og sagði niðurstöðuna sýna að Bretland þyrfti að yfirgefa Mannréttindasáttmála Evrópu.
Breska innanríkisráðuneytið vildi ekki tjá sig um málið.
