Krummi sem var á ferðinni í Hjaltastaðaþinghá á Fljótsdalshéraði var beðinn um að spá fyrir um niðurstöðu kosninganna. Krumminn var neikvæður en engum sögum fer af spádómsgáfu hrafnisins eða hvort nokkru sinni hafi reynt á hana áður.
Það var Þorvaldur Björgvin Ragnarsson smiður á Egilsstöðum sem rakst á hrafninn og krafði hann svara.
Kjörsókn í stærstu á stærsta kjörstað landsins, í Smáranum í Kópavogi þar sem allir Kópavogsbúar greiða sín atkvæði, var orðin jafnmikil klukkan 18 og hún var við lokun kjörstaðarins í sveitarstjórnarkosningum í vor.
Þetta segir Halla Björk Evans, fulltrúi í hverfiskjörstjórn Smárans í Kópavogi.
„Núna klukkan 18 vorum við að fá tölur og það eru 47% búin að kjósa og við vitum að það er um 20% utan kjörfundar. Þannig núna klukkan 18 erum við komin í sirka 67%, sem er sama og var í sveitarstjórnarkosningunum í Kópavogi. Þetta verður allavega spennandi og við eigum alveg von á því að þetta fari svolítið vel upp þegar líður á kvöldið,“ segir Halla.
Hún segir kjörfund hafa gengið vel. Hún segir kjósendur afslappaðri en í sveitarstjórnar- og alþingiskosningum og hún segist sakna þess að konur mæti í þjóðbúningum á kjörstað.
Rassskelltu kjósendur
Halla segir engan áróður hafa verið á kjörstað, en það hafi fimm ungar stúlkur mætt skrautlega klæddar og með bolluvendi fyrir utan kjörstað fyrr í dag.
„Þær stóðu hérna fyrir utan og sögðu þetta eru okkar kosningar og okkar framtíð og við viljum fá að kjósa, og óskuðu eftir að fá að rassskella með bolluvöndunum alla aðra sem fengu að kjósa en ekki þær,“ segir Halla.
Magnús Hlynur Hreiðarson skrifar frá Selfossi:
Eyrún Olsen og Hjörtur Þórarinsson, sem búa á Selfossi mættu prúðbúin í Vallaskóla í dag þegar þau kusu í þjóðaratkvæðagreiðslunni. Hún í eldri gerð af faldbúningi og hann í herrabúningi. Eyrún saumaði búningana hjá Hildi Rosenkjær í Annríki og Ásmundur maðurinn hennar smíðaði nær allt skartið.
Eyrún segist hafa alist upp við að heiðra kosningaréttinn og klæða sig upp á kjördag. Þá hefð hafi hún reynt að halda í.
„Þessa búninga saumaði ég, fyrst faldbúninginn sem ég lauk 2016 og síðan herrabúninginn 2018 með sínum 52 handsaumuðu happagötum,“
Það tekur aðeins um 10-11 vikur að sauma herrabúning en 3 ár að sauma faldbúning, segir Eyrún.
Halla Tómasdóttir, forseti Íslands, greiddi sitt atkvæði í Álftanesskóla í dag ásamt Birni Skúlasyni, eiginmanni sínum, og Auði Ínu, dóttur þeirra.
Nú fer hver að verða síðastur að ákveða sig hvort hann segi já eða nei í þjóðaratkvæðagreiðslunni. Kjörstaðir loka eftir fimm klukkustundir.
Framlag Íslands í Eurovision 1992 var einmitt lagið Nei eða já.
Gunnhildur Gylfadóttir, bóndi á Steindyrum, mætti prúðbúin í íslenskum þjóðbúning og á Massey Ferguson 165 dráttarvél á kjörstað á Dalvík.
Sælkerabúðin Vellir í Svarfaðadal deildi þessari mynd af henni á Facebook.
Tökumaður okkar á Vestfjörðum leit við á kjörstað á Ísafirði. Þar var stöðugur straumur af fólki. Ísafjörður er í Norðvesturkjördæmi, en þar var kjörsókn 40,9% klukkan 15.
Sigmundur Davíð Gunnlaugsson, formaður Miðflokksins, greiddi atkvæði sitt í Fjölbrautaskólanum í Garðabæ síðdegis.
Fyrstu tölur úr Suðurkjördæmi eru væntanlegar strax á ellefta tímanum en annarsstaðar frá því upp úr miðnætti. Síðustu tölur gætu borist úr Norðvestur- og Norðausturkjördæmum klukkan sjö í fyrramálið. Nánar um talningu í þessari frétt:
Við ræddum við Ólöfu Magnúsdóttur, verkefnastjóri skrifstofu borgarstjórnar, um talningu í Reykjavík og einnig er hægt er að horfa á viðtalið hér:
Ljósmyndari RÚV rakst á þessa hressu krakka sem höfðu sett upp tombólu fyrir utan kjörstað í Vesturbæjarskóla í Reykjavík.
Helga Eymundsdóttir formaður kjörstjórnar á Akureyri segir ekki mikinn mun á framkvæmd þjóðaratkvæðagreiðslunnar og alþingis- eða sveitarstjórnarkosningar.
Hún segist vera með þaulvant fólk í vinnu og að röð hafi verið við kjörstað við opnun. Þá hafi verið stanslaust rennerí af fólki síðan. Kjörsókn sé betri og allt stefni í metkjörsókn.
Siguróli Magni Sigurðsson, fréttamaður á Akureyri, tók nokkra kjósendur tali fyrir utan kjörstað í dag. Það voru þau Rafn Sveinsson, Sindri Þór Guðmundsson, Baldur Marinósson , Pétur Valgeir Pálmason, Kolbrún Ósk Eðvaldsdóttir, Jóhannes Sigvaldason, Apríl Ýr Kro, Stefán Gíslason og Sonja Kro.
Hann ræddi einnig við tvo erlenda ferðamenn sem hér eru staddir. Þar sem viðtalið er ekki textað í spilaranum verður það lauslega þýtt hér:
Bandaríkjamaðurinn Martin Kelly sagði það mjög jákvætt að þjóðin hefði atkvæðarétt í þessu máli. Kosningaréttur væri eitthvað sem Bandaríkjamenn væru mjög stoltir af.
Hann sagðist telja að fólk yrði að kjósa samkvæmt eigin sannfæringu um hvað væri best fyrir landið og hvað geri fólk stolt af sínu landi. Efnahagslega sagði hann að það hefði eflaust einhverja kosti að ganga í Evrópusambandið, en að fólk yrði að kjósa það sem það vildi fyrir sjálft sig, fjölskyldu sína og afkomu sína.
Einnig var rætt við Michael Collins frá Bretlandi. Sá kvaðst vissulega vita hvað væri um að vera á Íslandi í dag, atkvæðagreiðsla um aðildarviðræður við Evrópusambandið.
Spurður hvort hann hefði einhver ráð handa Íslendingum byrjaði hann að segja „ekki gera það“ en dró það síðan til baka og vildi byrja upp á nýtt.
„Það sem ég ætlaði að segja er að þið viljið ganga í [ESB], því við fórum [úr ESB] og við sjáum eftir því,“ sagði Michael.
Hann sagðist ekki hafa séð hag Breta batna eftir að þeir gengu úr Evrópusambandinu. Hann segir efnahaginn verri en hann var og ferðalög séu flóknari. Hann sjái enga kosti.
„Ég held að í þessum heimi þurfirðu bandamenn. Þú þarft að halda vinum þínum nærri og ég held það sé það sem ESB býður. Við höfum tapað því, við sitjum svolítið fyrir utan núna. Þar sem þið eruð, ég held að þið verðið að vera nær öðrum. Ég skil alveg að rétturinn til fiskveiða er ykkur mjög mikilvægur og þið þurfið að berjast fyrir honum. En ég held að við lifum í heimi þar sem við þurfum að vera nær bandamönnum okkar.“
Formenn kjörstjórna segja daginn fara vel af stað.
Í Reykjavík er meiri kjörsókn en fyrir Alþingiskosningarnar 2024. Í Reykjavíkurkjördæmi norður höfðu 13,7% kosið klukkan tólf á hádegi en rúmlega 10% fyrir síðustu Alþingiskosningar.
Í Reykjavík Suður voru rúmlega 14% búnir að greiða atkvæði í hádeginu samanborið við rúmlega 11% fyrir Alþingiskosningarnar.
Á Akureyri voru tæplega 1.300 búnir að kjósa klukkan ellefu, það er 8,7% þáttaka, einu 1,7 prósentustiga meiri þátttaka en fyrir Alþingiskosningar.
Kjörsókn í Suðvesturkjördæmi var 7,5% klukkan ellefu. Það er talsvert meiri kjörsókn en í síðustu Alþingiskosningum þegar rúmlega 6% voru búnir að kjósa á saman tíma. Í Suðvesturkjördæmi hafa nú rúmlega 6.000 mætt á kjörstað.
Rúmlega 4.000 voru búnir að greiða atkvæði í Suðurkjördæmi klukkan ellefu, það er 9,6% kjörsókn.
Í Norðvesturkjördæmi höfðu rúmlega 15% greitt atkvæði klukkan hálft 12 samanborið við tæplega 11% í síðustu Alþingiskosningum.
Ólafur Þ. Harðarson stjórnmálafræðingur segir flokkahollustu það sem skýri mest hvað fólk komi til með að velja í þjóðaratkvæðagreiðslunni.
„Þetta virðist vera hnífjafnt. Og eiginlega út frá gögnunum sem við höfum er algjörlega ómögulegt að spá fyrir um það hvort já-ið verður ofan á eða nei-ið verður ofan á,“ segir Ólafur Þ. Harðarson, stjórnmálafræðingur, í Vikulokunum á Rás 1.
Hann segir ólíklegt að ríkisstjórnin falli verði niðurstaðan nei. Nánar um viðtalið við Ólaf í fréttinni hér að neðan.
Halldór Benjamín Þorbergsson, einn forsprakka Áfram Íslands, sem beitir sér gegn aðildarviðræðum Íslands við ESB, greiddi atkvæði í Hagaskóla í Reykjavík á tólfta tímanum.
Kristrún Frostadóttir forsætisráðherra greiddi atkvæði sitt í Álftamýraskóla í Reykjavík skömmu fyrir hádegi. Þar var fjöldi fulltrúa innlendra og erlendra fjölmiðla mættur til að fylgjast með og ræða við hana.
Erlendir fjölmiðlar beina sjónum sínum að þjóðaratkvæðagreiðslu Íslands um aðildarviðræður að Evrópusambandinu. Hér að neðan eru nokkur dæmi um umfjallanir erlendra miðla.
Kjörsókn í Reykjavík klukkan 11 var talsvert betri en á sama tíma í alþingiskosningum 2024. Klukkan 11 höfðu rúm 8% greitt atkvæði, en í alþingiskosningunum höfðu rúm 5% greitt atkvæði klukkan 11.
Á Akureyri var kjörsókn klukkan 11 8,7%.
Kjörsókn í utankjörfundaratkvæðagreiðslu var einnig mjög góð.
Í Vikulokunum í dag er rætt um þjóðaratkvæðagreiðslu um aðildarviðræður við Evrópusambandið, uppsagnir hjá Reykjavíkurborg, kjarasamninga og verðbólgu. Þátturinn er í beinni útsendingu á samtengdum Rásum 1 og 2, en líka í á RÚV.is og þar er þátturinn einnig í mynd. Þátturinn hófst klukkan ellefu og honum lýkur skömmu fyrr hádegisfréttir útvarps klukkan 12:20.
Þorgerður Katrín Gunnarsdóttir utanríkisráðherra greiddi atkvæði í Lækjarskóla í Hafnarfirði á ellefta tímanum. Hún mætti á kjörstað ásamt dóttur sinni. Fjölmargir innlendir og erlendir fjölmiðlar mættu til að fylgjast með Þorgerði og ræða við hana um þjóðaratkvæðagreiðsluna.
Guðrún Hafsteinsdóttir, formaður Sjálfstæðisflokksins, greiddi atkvæði í Hveragerði klukkan tíu.
Já- og nei-hreyfingarnar bjóða kjósendum far á kjörstað.
Á vef Já til að sjá er gefið upp símanúmer sem fólk getur hringt í vanti það far.
Á vef Áfram Ísland býðst þeim sem ekki komast hjálparlaust á kjöstað að fylla út form og hringt verður í viðkomandi til að ákveða tíma.
Við ræddum við Þorgerði Katrínu Gunnarsdóttur utanríkisráðherra á dögunum um hvað gerist eftir þjóðaratkvæðagreiðsluna. Hvort sem niðurstaðan verður já eða nei segir Þorgerður sitt fyrsta verk verða að kalla sama utanríkismálanefnd Alþingis.
Verði svarið já verður Evrópusambandinu formlega tilkynnt um niðurstöðuna, samninganefnd mynduð og loks hefjast viðræður.
Verði svarið nei verður niðurstaðan rædd á Alþingi og afstaða tekin til afturköllunar umsóknarinnar. Verði niðurstaðan nei mun sitjandi ríkisstjórn ekki taka Evrópusambandsaðild upp að nýju.
Nánar um svar Þorgerðar í þessari frétt:
Í Breiðagerðisskóla í Reykjavík var nokkur fjöldi kjósenda mættur á kjörstað við opnun klukkan níu í morgun og ágætis rennerí á tíunda tímanum.
Í Reykjavík og mörgum stærri sveitarfélögum verður kjörfundur opinn til klukkan tíu í kvöld - en upplýsingar um opnunartíma kjörstaða má nálgast á vefsíðum sveitarfélaga.
Það munar innan við prósentustigi á já- og nei-hreyfingunni í nýjustu könnun Maskínu sem gerð var í gær. Örlítið fleiri ætla að segja já.
Í þjóðaratkvæðagreiðslunni svara kjósendur einni spurningu með því að merkja X við já eða nei: „Á Ísland að hefja á ný aðildarviðræður við Evrópusambandið?“
Þá má benda á vef Landskjörstjórnar þar sem fjölmörgum spurningum um atkvæðagreiðsluna er svarað.
Í síðasta Þjóðarpúlsi Gallup fyrir þjóðaratkvæðagreiðslu sögðust aðeins fleiri ætla að segja nei við því að hefja á ný aðildarviðræður við ESB. 51,6% sögðust ætla að segja nei en 48,4% já.
Ef lesendur eiga enn eftir að gera upp hug sinn er til dæmis hægt að horfa á umræðuþátt um þjóðaratkvæðagreiðsluna, sem tekinn var upp í beinni útsendingu á RÚV á fimmtudagskvöld. Þátturinn var rúmlega 80 mínútur og er hægt að nálgast í fréttinni hér að neðan eða í Spilara RÚV.
- Íslenskir ríkisborgarar sem hafa náð 18 ára aldri og eru með lögheimili hér á landi hafa kosningarétt. Það hafa einnig íslenskir ríkisborgarar búsettir erlendis, ef þeir hafa búið skemur en 16 ár erlendis. Hafi þeir búið lengur en 16 ár erlendis þarf að sækja um til Þjóðskrár að vera tekinn á kjörskrá.
- Til að sjá hvar þú átt að kjósa er hægt að fara inn á vef Þjóðskrár og slá inn kennitölu.
- Kjörstaðir eru víðast hvar opnaðir klukkan 9 og standa opnir til klukkan 22, en nánari upplýsingar um opnunartíma kjörstaða er að finna á vefsíðum sveitarfélaganna.
- Utankjörfundaratkvæðagreiðsla hjá Sýslumanninum á Höfuðborgarsvæðinu er opin frá klukkan 10 til 17 fyrir kjósendur sem ekki geta sótt kjörfund. Hér er hægt að finna nánari upplýsingar um opnun utankjörfundaratkvæðagreiðslu.
- Til að fá að greiða atkvæði verður að framvísa gildum persónuskilríkjum. Það getur verið vegabréf, nafnskírteini eða ökuskírteini.
Velkomin á fréttavakt um þjóðaratkvæðagreiðslu um aðildarviðræður Íslands að Evrópusambandinu. Kjörstaðir verða opnaðir innan skamms, klukkan níu.
Líkt og greint var frá í gær höfðu þegar 23% þjóðarinnar greitt atkvæði utan kjörfundar. Það er meira en áður.
Við ætlum að fylgjast með öllum helstu vendingum á kjördag hér í fréttavaktinni.
