Kanada gæti orðið næsta ríki til að taka þátt í Eurovision.
Þetta varð ljóst eftir að kanadíska ríkisútvarpið, CBC/Radio Canada, fékk fulla aðild að Samtökum evrópskra sjónvarpsstöðva, EBU, í vikunni. Landið hefur um árabil verið áheyrnarmeðlimur í EBU.
Hugsanleg þátttaka Kanada í Eurovision hefur oft komið til tals, einkum eftir að Ástralir tóku að keppa árið 2015. Hugmyndin fékk byr undir báða vængi á síðasta ári þegar Mark Carney, forsætisráðherra landsins, nefndi þátttöku í Eurovision sem dæmi um leið til að styrkja tengsl Kanada og Evrópu. Hann hefur lagt ríka áherslu á samstarfið við álfuna.
Eurovision-keppnin hefur verið haldin árlega frá 1956. Síðustu ár hafa deilur um þátttöku Ísraelsríkis sett svip sinn á keppnina. Áhorf dróst saman í fyrra og fimm ríki, þar á meðal Ísland, sniðgengu keppnina.
Innkoma nýs ríkis, sem gæti breytt ásýnd keppninnar, gæti því verið kærkomin fyrir EBU.
Kanada yrði fjórða ríkið sem er alfarið utan Evrópu til að keppa í Eurovision. Auk Ísraels og Ástralíu tók Marokkó þátt í keppninni árið 1980.
Kanadamenn hafa að vísu átt fulltrúa á stóra sviðinu. Það var Celine Dion, sem keppti fyrir hönd Sviss árið 1988, og vann keppnina með laginu Ne partez pas sans moi.
