Evrópubúar eru enn í greipum hitabylgju. Viðbúið er að hiti fari yfir þrjátíu og fimm stig hjá tæplega 100 milljónum manna í álfunni. Heitast verður í Frakklandi og á Spáni. Sendiherra Íslands á Spáni segir fólk vant miklum hita en hann sé óvenjulega snemma á ferðinni.
Yfir 30 stiga hiti hjá meira en tveimur þriðju Evrópubúa
Í mati AFP-fréttastofunnar er auk þess búist við yfir 30 stiga hita hjá yfir þrjú hundruð og fimmtíu milljónum, sem eru meira en tveir þriðju íbúa álfunnar.
Í vesturhluta Frakklands eru tugir þúsunda heimila rafmagnslaus vegna hitans. Viðvaranir ná yfir rúmlega helming landsins og búist er við að hiti fari hæst í 43 stig síðar í dag.
Rauð viðvörun er einnig í Bretlandi og búið að loka yfir 1000 skólum á Englandi og í Wales. Samkvæmt veðurspám gæti hiti farið upp í 37 stig í suðurhluta Englands.
Hitabylgjan er að breiðast út um álfuna og næstu daga má búast við miklum hita í austurhluta hennar.
Hitabylgjan fyrr á ferðinni en fólk á að venjast
Hitamet júnímánaðar féll á Spáni, samkvæmt veðurstofu landsins. Hærri meðalhiti hefur ekki mælst í júní síðan að minnsta kosti 1950. Meðalhiti á mánudag var 28,08 stig og 28,17 stig á þriðjudag.
Kristján Andri Stefánsson er sendiherra Íslands á Spáni. Hann segir hitann hafa farið mest upp í 44 stig. Viðvaranir hafi verið gefnar út fyrir nánast allt landið.
Dagný Hulda Erlendsdóttir fréttamaður ræddi við Kristján í dag. Viðtalið má sjá í spilaranum.
„Fólk er vant miklum hitum en allir hafa orð á því að þetta sé fyrr á ferðinni heldur en það hafi átt að venjast. Ég sá tölfræði um að það væru skráðar 91 hitabylgja á Spáni á fyrsta aldarfjórðungi þessarar aldar sem væru helmingi fleiri en á síðasta aldarfjórðungi síðustu aldar, 20. aldar, sem segir manni ákveðna hluti um loftslagsbreytingarnar og hvað er við að eiga.“
Útlit er fyrir að hitabylgjan sé að renna sitt skeið en rauð viðvörun er enn í hluta Baskalands á Norður-Spáni. Búist er við 39 stiga hita í Bilbao í dag.
Kristján segir stjórnvöld veita ýmis ráð til að takast á við hitann. Flestir byrgi fyrir glugga til að verjast sólinni og eini tíminn til að fara út og hreyfa sig sé á morgnana.
„Annars bara drekka mikið af vatni, varast sykraða drykki, áfenga drykki, ekki borða of mikið. Meira af ávöxtum, grænmeti, kaldar súpur eru vinsælar hérna, gazpacho. Svona hlutir sem maður er fljótur að temja sér í viðureigninni við hitann.“
Þessum mikla hita fylgi oft skógareldar, þeir komi yfirleitt síðsumars. Kristján hefur þó ekki orðið var við elda enn. „Þetta er erfitt ástand sem skapast af þessu.“
Hann segir Spánverja bókstaflegri með árstíðirnar en Íslendingar eigi að venjast.
„Vorið byrjar á jafndægri á vorin og stendur fram að sumarsólstöðum. Þannig að sumarið er nýbyrjað hérna þannig að þeim finnst þetta allt dálítið fyrr á ferðinni en það ætti að vera. Hitarnir eru fólki þó ekki ókunnugir en veðrinu fylgir oft mikið þrumuveður. Þetta er eins og með kuldann, það er jafnerfitt að venjast hitanum eins og miklum kuldum, finnst mér.“
