Íslenskur læknir varpar nýju ljósi á lífshættulegan meðgöngusjúkdóm
Nítján ára gömul lá Silja Rut Ragnarsdóttir nær dauða en lífi á skurðarborði Landspítalans eftir alvarlegt tilfelli meðgöngueitrunar. Íslenskur vísindamaður í Bandaríkjunum, Jóhann Elí Guðjónsson húðlæknir, leiðir brautryðjandi rannsóknir sem varpa nýju ljósi á hvers vegna sjúkdómurinn kemur fram. Hann telur mögulegt að þróa lyf við sjúkdómnum sem bjargað gæti mannslífum.
Silja Rut Ragnarsdóttir, fimmtug þriggja barna móðir úr Hafnarfirði, man skýrt þann dag fyrir þrjátíu árum sem henni varð ljóst að ekki væri allt með felldu. Hún ætlaði sér ferð niður stigann í litla fjölbýlishúsinu sem hún bjó í að sækja póstinn. Hún þurfti einungis að fara niður örfá skref en á leiðinni niður upplifði hún sjóntruflanir með þeim afleiðingum að hún þurfti að hafa sig alla við að fóta sig varlega. Höfuðið var þungt og fæturnir bólgnir, langt umfram það sem taldist eðlilegt fyrir grannvaxna unga konu. Hún var þá nítján ára og gengin rúmlega tuttugu vikur með sitt fyrsta barn.
„Það er eiginlega fyrsti vísirinn að þessu,“ segir Silja Rut í dag. „Þessi svakalegi bjúgur, þungi í höfðinu og einhverjar sjóntruflanir.“ Einkennin sem Silja lýsir eru einkenni sem gjarnan er skimað eftir í mæðravernd í dag. Hún var með meðgöngueitrun (e. pre eclampsia). Það er algengur sjúkdómur …
