Sverrir Helgason segir Jasminu Vajzović Crnac hafa flúið fjölmenninguna í Bosníu og vísar til landsins sem dæmis um að fjölmenningarstefna gangi illa. Hann svaraði í streymi á X ummælum hennar í hlaðvarpinu Ein pæling, þar sem hún sagði feðraveldi fremur en íslam skýra undirskipun kvenna.
„Jasmína flúði fjölmenninguna. Hún býr á Íslandi af því að fjölmenningin var ekki að virka,“ sagði Sverrir.
Jasmina er stjórnmálafræðingur og sérfræðingur í málefnum flóttafólks og innflytjenda, auk þess að vera fyrrverandi varaformaður Viðreisnar. Hún kom til Íslands sem flóttabarn frá Bosníu árið 1994, þá 13 ára. Hún var gestur Þórarins Hjartarsonar í Einni pælingu 23. október 2026.
Segir feðraveldi ráða túlkuninni
Í myndbroti úr þættinum ræðir Jasmina trúarbrögð, vald karla og stöðu kvenna.
„Það er ekki út af trúarbrögðum. Það er út af feðraveldi … það er af því að karlmenn stjórna … það eru svo margir sem eru ómenntaðir. Þannig að þegar þú ert að túlka Kóraninn, auðvitað viltu túlka það að konur eigi að vera svona og svona,“ segir hún.
„Íslam boðar ekki að konur eigi að vera undirgefnar.“
Í opna hluta þáttarins sagði Jasmina að fólk sem kæmi úr stríðsátökum og hefði aldrei gengið í skóla væri líklegra til að fara út í glæpi. Hún taldi skýringuna liggja í aðstæðum fólksins, fremur en því að það væri múslimar eða flóttamenn.
Sverrir vísar til Bosníu
Í streymi sínu á X sagði Sverrir: „þessi kona frá Bosníu alltaf að segja okkur frá því hvað fjölbreytileikinn er góður“. Hann spurði síðan: „Er ekkert búið að vera neitt vesen á fjölmenningarstefnunni þar?“
Sverrir vísaði til þess að samkvæmt stjórnarskrá Bosníu og Hersegóvínu væri forsætisráð landsins skipað þremur mönnum: einum Bosníaka, einum Króata og einum Serba.
„Landið hennar Jasmínu er bara lifandi dæmi um það hvað fjölmenningarstefnan gengur illa,“ sagði hann.
Í myndbandinu birtist yfirskriftin „Bosnía: Þegar fjölmenning stöðvar framfarir“ yfir mynd af Jasminu og grein hennar á Vísi.
Fjallaði um uppruna í grein á Vísi
Jasmina birti greinina „Hvenær varð uppruni að skýringu á öllu?“ á Vísi 22. október. Greinin kom í kjölfar ummæla Elliða Vignissonar bæjarstjóra um innflytjendamál.
Hún var einnig gestur Reykjavíkur síðdegis á Bylgjunni 23. október. Viðtalið er birt á Vísi undir yfirskriftinni „Fengi ég vinnu hjá Elliða sem múslimi?“
