„Úrkomusvæði sem kemur úr austri mjakast yfir landið í dag með úrkomu, en sunnan- og vestanlands verður úrkomulítið þangað til í kvöld. Þó gæti hann hangið þurr syðst á landinu,“ segir í hugleiðingum veðurfræðings. Hiti verður á bilinu 0-7 stig.
Víðast hvar lægir með kvöldinu og á morgun og reiknað er með hægri breytilegri átt. Úrkomusvæðið verður yfir norðanverðu landinu en smám saman dregur úr úrkomu. Sunnanlands verður að mestu þurrt og skýjað með köflum.
Veðurhorfur á landinu næstu daga:
Á mánudag:
Breytileg átt, 3-10 m/s og rigning, en slydda eða snjókoma til fjalla á norðanverðu landinu en dregur smám saman úr úrkomu. Skýjað með köflum sunnan heiða. Hiti 0 til 6 stig að deginum.
Á þriðjudag:
Norðlæg átt, 8-15 m/s, hvassast norðvestantil og austast. Rigning eða súld, en úrkomulítið á Suðausturlandi. Hiti 4 til 9 stig.
Á miðvikudag:
Hæg breytileg átt, en norðvestlæg átt, 5-13 austast fram á daginn. Rigning eða slydda nyrst, en styttir upp seinnipartinn. Annars úrkomulítið og bjart með köflum suðaustanlands. Hiti 1 til 7 stig.
