Það stefnir í hörkuspennandi kosningar í Brasilíu í dag þegar önnur umferð forsetakosninganna fer fram. Mjótt er á munum milli sitjandi forseta og leiðtoga Verkamannaflokksins Luiz Inacio Lula da Silva og Flavio Bolsonaro, sem er öldungadeildarþingmaður og sonur fyrrum forseta landsins, Jair Bolsonaro.
Tugir þúsunda stuðningsmanna beggja frambjóðenda fylltu götur Rio De Janeiro í gærkvöld þeim til stuðnings. Stuðningsfólk Lula kom saman á Copacabana-ströndinni og hundruð mótorhjólamanna þöndu mótorhjól sín um götur borgarinnar til stuðnings Bolsonaro.
Norska ríkisútvarpið segir að niðurstöður skoðanakannana í dag bendi til þess að Bolsonaro fái 46,3% atkvæða en Lula 45% atkvæða.
Lula, sem verður áttatíu og eins árs í næstu viku, fékk 45 prósent atkvæða í fyrstu umferð kosninganna og Bolsonaro fékk 47 prósent. Þeir hafa gagnrýnt hvorn annan harkalega í kosningabaráttunni og sakað hvorn annan um spillingu.
Hafi Bolsonaro betur í síðari umferð kosninganna á morgun bætist Brasilía í stækkandi hóp ríkja Rómönsku Ameríku þar sem hægrisinnaðir frambjóðendur hafa náð kjöri.
Rætt var við Hólmfríði Garðarsdóttur, prófessor og sérfræðing í málefnum Rómönsku-Ameríku, um forsetakosningarnar í Brasilíu í fréttaskýringaþættinum Þetta helst nýverið. Hægt er að hlusta á viðtalið við Hólmfríði í spilaranum hér fyrir neðan.
