Ása Berglind Hjálmarsdóttir, þingmaður Samfylkingarinnar í Suðurkjördæmi og annar varaformaður umhverfis- og samgöngunefndar, segir stöðuna á samgöngum til og frá Vestmannaeyjum óboðlega.
Landeyjahöfn hefur verið lokuð mestallt árið vegna sandburðar og annar rafmótor Herjólfs bilaði fyrir hálfum mánuði.
„Þetta er auðvitað ekki eitthvað sem er nýtt, þetta er búin að vera vonlaus staða í svolítið langan tíma, mörg ár, og auðvitað mjög leiðinlegt að skipið hafi þurft að bila á sama tíma og veðursaðstæður eru með þeim hætti að það hefur ekki verið hægt að opna Landeyjahöfn, sem hefur yfirleitt tekist upp úr marsmánuði,“ segir Ása Berglind.
Binda vonir við belgískt og danskt fyrirtæki
Nú horfi hins vegar til betri vegar eftir „ófremdarástand“.
Innviðaráðuneytið hefur ákveðið að bregðast við með því að framlengja ríkisstyrkt áætlunarflug til Vestmannaeyja til 15. maí og fjölga ferðum í tvær á dag frá og með fimmtudegi.
Ása segir skipta miklu máli að flogið verði tvisvar á dag til eyja og að byrja eigi að moka sand úr Landeyjarhöfn aftur, gangi ölduspá eftir.
„Svo bindum við auðvitað mjög miklar vonir við þetta belgíska fyrirtæki sem Vegagerðin er búin að semja við sem á að sinna dýpkun frá og með september, af því þau eru með skip sem eru með miklu meiri tæknilega getu og munu vonandi ná að gera þetta þannig að þetta ástand skapist ekki eins og er búið að vera hérna síðustu mánuði,“ segir Ása.
„Þetta er eitthvað sem Vestmannaeyingar hafa kallað eftir í mjög langan tíma og við þingmenn kjördæmisins höfum lagt gríðarlega mikla áherslu á.“
Þá segir Ása samgöngunefnd einnig binda vonir við niðurstöður danskrar straumfræðistofu sem sé búin að rannsaka aðstæður við Landeyjahöfn og muni leggja fram tillögur að lausnum.
Halla Hrund Logadóttir, þingmaður Framsóknarflokksins, óskaði eftir því að samgöngur til Eyja yrðu ræddar í samgöngunefnd. Ása segir nefndina hafa brugðist við beiðninni með stofnun frumkvæðismáls um samgöngur til Vestmannaeyja. „Þar sem við ætlum að fá opinn fund með innviðaráðherra og við ætlum að horfa svolítið heildstætt á þetta varðandi framtíðarsýn um þessi mál.“
Íþróttakrakkar missi marga daga úr skóla
Á meðan ómögulegt hefur verið að sigla til Landeyjahafnar hefur Herjólfur siglt til Þorlákshafnar sem er mun lengri leið. Í fyrrakvöld tók sigling Herjólfs frá Þorlákshöfn til Vestmannaeyja tæpar sjö klukkustundir og skipið lagði ekki að bryggju fyrr en um klukkan hálf þrjú í nótt.
Um borð í skipinu voru meðal annars handboltastrákar sem misst hafa marga daga úr skóla vegna stöðunnar.
Bergvin Haraldsson, yfirþjálfari yngri flokka ÍBV í handbolta, segir það hafa verið mjög erfitt að skipuleggja keppnisferðir vegna ástandsins og eins að fá önnur lið til Eyja þegar ferðalagið er eins langt og raun ber vitni.
„Þetta var 19 tíma vinnudagur í gær hjá þeim að keppa 50 mínútur í handbolta þannig að maður getur ekki annað en dáðst að þeim fyrir dugnað og að nenna þessu,“ segir Bergvin.
Lágu í fósturstellingu af sjóveiki
Ferðalagið í nótt hafi verið langt og erfitt og margir strákanna orðið sjóveikir. „Margir hverjir lágu bara í fóstursellingunni þarna að reyna að klára þessa ferð og ég efast um að þeir hafi mætt í skólann í morgun. Að sama skapi tóku þeir líka frí í skólanum í gær til þess að keppa þessa leiki. Þannig að þetta er búið að taka svolítið marga skóladaga að reyna að klára þetta,“ segir Bergvin.
Hann segir það versta við ástandið vera að enginn sjái fyrir endann á því. Vestmannaeyingar eru flestir komnir með nóg og í gærkvöld var stofnaður undirskriftarlisti til að krefjast úrbóta í Landeyjahöfn.
