Hlauparar frá 38 þjóðlöndum eru nú að koma til landsins til að keppa í einu stærsta utanvegahlaupi landsins í Hveragerði, „Hengill Ultra“, en reiknað er með að um þúsund hlauparar taki þátt í hlaupinu.
Hlaupið verður nú haldið í 15. sinn laugardaginn 6. júní. Heilmikill undirbúningur er fyrir hlaup sem þetta en þar kemur heimakonan Rakel Magnúsdóttir sterkt inn en hún hefur verið kynnir á hlaupunum síðustu ár og verður engin undantekning á því núna. Reiknað er með um þúsund þátttakendum í hlaupið.
„Það voru held ég 27 þjóðerni í fyrra en það er komið upp í 38 núna, þannig að þetta hlaup er farið að vekja gríðarlega mikla athygli bara um allan heim,” segir Rakel og bætir við.
„Við erum náttúrulega að hlaupa á eldfjallasvæði og náttúran er náttúrulega alveg einstök hérna, þetta er svo fjölbreytt. Þú ert að hlaupa í gegnum dali, upp á fjall, yfir ár og í jarðhitanum, þannig að þetta er bara alveg einstök náttúruupplifun. Svo er þetta bara líka geggjuð stemning þannig að þetta er bara eitthvað sem er búið að spyrjast út.”
En er þetta mjög erfið hlaupaleið eða tiltölulega létt?
„Ég held að flestir sem hafa hlaupið þessa leið geti verið sammála um að þetta sé ekki auðvelt en við erum samt með allt frá fimm kílómetra leið fyrir byrjendur og upp í 106 kílómetra, þannig að þetta er eitthvað fyrir alla,” segir Rakel, spennt fyrir næstu helgi.
