Breytingar á einkunnagjöf hefðu ekki átt að koma kennurum á óvart, segir Inga Sæland mennta og barnamálaráðherra sem gefur lítið fyrir fullyrðingar grunnskólakennara um samráðsleysi við breytingarnar.
Ráðherra kynnti fyrir nokkrum dögum breytingar á námsmati í grunnskólum - tölustafi í stað bókstafa - sem eiga að taka gildi næsta vor við lok 10. bekkjar.
Talsverð gagnrýni hefur borist frá kennarasamfélaginu frá því að fyrst spurðist af þessum áformum í apríl - ráðherra er sögð hafa haft lítið sem ekkert samráð við kennara og formaður Félags grunnskólakennara sagði í hádegisfréttum að þetta skapaði óvissu í upphafi skólaárs.
Sjaldan jafn mikið samtal við nokkurn hóp
„Ég segi nú einfaldlega; ég held að það hafi sjaldan verið jafn mikið samtal við nokkurn hóp og kennarahópinn okkar sem flestir hafa tekið þessum breytingum fagnandi,“ segir Inga Sæland mennta- og barnamálaráðherra.
En hvað gæti skýrt þessi sterku viðbrögð frá kennaraforystunni?
„Ég hef látið þau heyra af þessum áformum mínum alveg síðan ég var skipuð sem mennta- og barnamálaráðherra og tók að mér þetta verkefni. Það er ekkert sem kemur þeim á óvart, ekki neitt.“
Hagsmunir barna og foreldra að leiðarljósi
Að mati ráðherra hafa kennarar haft fjölmörg tækifæri til að kynna sér málið.
„Ég veit ekki hvað þeir kalla samráð, hvort það þýði að þeir vilji ráða þeirri stefnu sem ég er að marka inni í menntamálaráðuneytinu. Ég bið bara um samstarf og góðan vilja, þeir fá allan þann stuðning sem þeir þurfa á halda við þessa breytingu.“
Ráðherra segist fyrst og fremst hafa hagsmuni barna og foreldra þeirra í huga við þessa breytingu og segist fá mjög jákvæð viðbrögð frá kennurum almennt, bæði hvatningu og þakkir.
Vilja koma í veg fyrir mismunun
Hún segir tilgang breytingarinnar m.a. vera að minni líkur verði á mismunandi einkunnagjöf milli skóla, sér í lagi við lok grunnskólagöngu. „Við erum að koma í veg fyrir mismunun 10. bekkinga þegar þeir eru að útskrifast, að þau sitji við sama borð.“
Er ekki mikilvægt að mennta- og barnamálaráðherra sé í góðu samstarfi og góðu samtali við kennarastéttina?
„Mesta samtal sem er til í ráðuneytinu er við kennara. Ég held að það sé ekkert skortur á því.“
