Frá þessu er greint á Instagramsíðu veitingastaðanna, sem eru á Tryggvagötu og í Bankastræti. Þar segir að þjófarnir hafi haft á brott tvö rafmagnshlaupahjól, spjaldtölvu og myndavél af gerðinni GoPro.
Alls ekki einsdæmi
„Því miður virðist þetta ekki vera einsdæmi, því það hefur verið brotist inn á fullt af stöðum síðustu daga.“
Það er ekki ofsögum sagt enda greindi Vísir frá því í morgun að það sem af er mánuði hafi 61 tilkynning um innbrot borist Lögreglunni á höfuðborgarsvæðinu. Þar af hafi 45 borist lögreglumönnum á lögreglustöðinni á Hverfisgötu, sem halda uppi lögum og reglu í Vesturbæ, Miðborg, Hlíðum, Laugardal, Háaleiti og á Seltjarnarnesi.
Ásmundur Rúnar Gylfason, aðstoðaryfirlögregluþjónn á Hverfisgötu, segir í samtali við Vísi að það sé óvenjumikið af innbrotum.
Mættir á vettvang eftir sjö mínútur en þjófarnir þegar farnir
„Við erum með Securitas og tryggingar, en það skilar hvorki dótinu til baka né bætir upp fyrir tímann og orkuna sem fer í svona vesen,“ segir í Instagramfærslunni en Erna Pétursdóttir, sem á Ramen Momo ásamt eiginmanni sínum, Kunsang Tsering, segir í samtali við Vísi að menn á vegum Securitas hafi verið mættir á vettvang sjö mínútum eftir að innbrotsins varð vart en þá hafi innbrotsþjófarnir þegar verið á bak og burt.
Sem betur fer sé um svokallað preppeldhús veitingastaðanna að ræða og því hafi engir peningar verið geymdir þar. Þetta hafi þó verið leiðinleg byrjun á deginum.
Þau hafi einu sinni áður lent í innbroti, á meðan faraldur kórónuveiru geisaði, og þá hafi þau íhugað að hætta að taka við reiðufé á veitingastöðum sínum en viðskiptavinir hafi mótmælt. Nú hafi þau ákveðið að hætta að taka á móti reiðufé frá og með morgundegi, enda sé það skynsamlegast í því ástandi sem nú ríkir í miðborginni.
„Þá erum við ekki að gefa fólki tilefni til þess að brjótast inn og stela pening.“
