Gylfi Þór minnist móður sinnar sem var myrt – „Ég mun kveikja á kerti í kvöld“ - DV

Gylfi Þór Þorsteinsson, oddviti Viðreisnar í Mosfellsbæ og sviðsstjóri hjá Rauða krossinum, minnist móður sinnar sem var myrt á þessum degi fyrir þrjátíu árum. Hann segir að alltaf hafi verið stutt í gleðina hjá henni.

„Í dag eru 30 ár síðan mamma mín var myrt, elsta dóttir mín var þá mánaðargömul og ég 26. ára. Enn þann dag í dag er fólk sem ég þekki ekki að koma upp að mér og minnast mömmu, þannig er líf efir dauðan,“ segir Gylfi Þór. „Ég mun kveikja á kerti í kvöld og minnast hennar með hlýju og gleði, því þannig var hún. Hlý og alltaf stutt í gleðina.“

Birtir hann mynd af fermingardegi móður sinnar.

„Nú eru börnin mín á svipuðum aldri og ég var þá, setur þetta allt í sérstakt samhengi fyrir mig nú,“ segir Gylfi Þór.

Sjá einnig:

Gylfi Þór opnar sig um morðið á móður sinni – „Þetta var sjón sem ég mun aldrei gleyma“

Móðir Gylfa Þórs var myrt árið 1996 á sveitabæ á Norðurlandi af bróður sínum. Hún hafði þá farið þangað til þess að gera upp mál eftir andlát móður þeirra. Bæði Gylfi Þór og faðir hans voru yfirheyrðir út af málinu á sínum tíma á lögreglustöðinni á Akureyri.

„Þegar pabbi losnaði úr yf­ir­heyrsl­unni hjá lög­regl­unni fór­um við upp á hót­el og kveikt­um á sjón­varp­inu. Þar var fyrsta frétt að morð hefði verið framið á þess­um bæ og mynd af bæn­um. Þannig frétt­um við að hún hefði verið myrt,“ sagði Gylfi Þór á sínum tíma í viðtali við mbl.is.