Tveir voru handteknir grunaðir um grunaðir um framleiðslu fíkniefna í heimahúsi. Þá voru einnig þrjú skotvopn haldlögð en þau voru ekki geymd í læstri hirslu samkvæmt reglum um meðferð skotvopna.
Þetta er meðal þess sem fram kemur í dagbók lögreglunnar á höfuðborgarsvæðinu vegna verkefna frá klukkan 17 í gær til klukkan 5 í morgun. Fjórir gista í fangageymslum nú í morgunsárið.
Ökumaður var stöðvaður í akstri grunaður um akstur undir áhrifum vímuefna. Þá var hann einnig með hníf meðferðis og var hnífurinn haldlagður og var ökumaðurinn kærður fyrir brot á vopnalögum.
Lögreglan á lögreglustöð 2, sem sinnir Hafnarfirði og Garðabæ, fékk tilkynningu um innbrot í heimahús en þar höfðu íbúar vaknað við að einhver var að gramsa í geymslu þeirra. Þjófurinn hljóp af vettvangi áður en lögreglan kom á staðinn.
Lögregla var kölluð til vegna umferðaróhapps en þar hafði maður á reiðhjóli dottið. Hann var fluttur á slysadeild til aðhlynningar.
