Rannsóknarnefnd samgönguslysa (RNSA) gat ekki komist að því hvers vegna 65 ára kafari missti meðvitund við köfun í Silfru á Þingvöllum í ágúst 2024.
Nefndin segir tafir á upplýsingagjöf lögreglu og skort á mikilvægum gögnum hafa komið í veg fyrir fullnægjandi rannsókn.
Þetta kemur fram í lokaskýrslu um alvarlegt köfunartvik frá RNSA.
Kafarinn var í skipulagðri ferð ásamt tveimur öðrum ferðamönnum og leiðsögukafara þegar atvikið varð. Annar kafari í hópnum, 74 ára, lenti ítrekað í erfiðleikum og fór tvisvar upp á yfirborðið.
Þegar leiðsögukafarinn og einn úr hópnum aðstoðuðu 74 ára kafarann sást sá 65 ára liggja hreyfingarlaus á botni lóns við enda köfunarsvæðisins. Leiðsögukafarinn sótti hann og kom honum upp á yfirborðið. Hann komst til meðvitundar í landi og var síðar fluttur með þyrlu á sjúkrahús.
Allir í hópnum höfðu tilskilin köfunarréttindi. Kafararnir tveir sem lentu í erfiðleikum voru jafnframt með læknisvottorð um að þeir væru nægilega heilsuhraustir til köfunarinnar. Búnaður kafarans sem missti meðvitund virkaði eðlilega og nægt loft var í kútnum.
Rannsóknarnefndinni var ekki tilkynnt um atvikið
Rannsóknarnefndinni var ekki tilkynnt um atvikið heldur frétti hún af því í fjölmiðlum daginn eftir. Lögregla svaraði beiðni nefndarinnar um upplýsingar ekki fyrr en 16 dögum síðar. Þá var kafarinn farinn úr landi.
Gögn úr köfunartölvu hans voru ekki lengur tiltæk og köfunarfyrirtækið gat ekki afhent dagbók með tæknilegum upplýsingum um ferðina.
Nefndin segir gögn frá lögreglu heldur ekki hafa verið nægilega ítarleg, meðal annars um köfunardýpi og botntíma mannsins.
Í skýrslunni er lögð áhersla á að leiðsögukafarar beri ábyrgð á öryggi allra í hópnum og eigi að hafa stöðugt og virkt eftirlit með þeim. Alvarlegt sé ef kafari er skilinn eftir á dýpi án eftirlits eða skýrra fyrirmæla um að fara upp á yfirborðið.
Nefndin telur jafnframt vanta skýrt verklag í lög um hvernig tilkynningum og upplýsingagjöf um köfunarslys til hennar skuli háttað. Sá skortur hafi hindrað rannsókn atviksins.
