Forsætisráðherra: Ráðherraskipan ekki einkamál hvers ráðherra fyrir sig
Kristrún Frostadóttir forsætisráðherra segir formenn stjórnarflokkanna hafa rætt stöðuna sem upp var komin vegna veikinda Guðmundar Inga Kristinssonar. Hún hafnar þó þeirri túlkun formanns Miðflokksins að formennirnir hefðu ákveðið í sameiningu að hann skyldi víkja úr ríkisstjórn.
Forystukonur ríkisstjórnarinnar, Valkyrjurnar svokölluðu, þær Kristrún Frostadóttir, Inga Sæland og Þorgerður Katrín Gunnarsdóttir, ræddu stöðu Guðmundar Inga Kristinssonar, þáverandi mennta- og barnamálaráðherra, þegar hann var í veikindaleyfi í byrjun árs. Eftir þann fund hafi þær svo rætt við Guðmund Inga.
Þetta kom fram í svörum Kristrúnar við fyrirspurn Sigmundar Davíðs Gunnlaugssonar, formanns Miðflokksins, á Alþingi í dag. Kristrún sagði ráðherra sitja í skjóli þingmeirihluta og því eðlilegt að formenn stjórnarflokkanna ræddu mál sem gætu haft áhrif á ráðherraskipan.
„Það er ekki einkamál hvers ráðherra eða hvers formanns þegar stórar ákvarðanir eru teknar um mannabreytingar, hvort sem það á rætur sínar að rekja til heilsufars eða annarra þátta,“ sagði Kristrún í þinginu.
Inga fór um tíma með þrjú ráðherraembætti meðan Guðmundur Ingi var í veikindaleyfi, þar á meðal embætti hans. Hún hefur áður sagt að þegar umfang aðgerðarinnar sem hann gekkst undir varð henni ljóst hefði verið nauðsynlegt að tryggja ráðuneytinu …
