Úrskurðarnefnd í vátryggingamálum hefur hafnað kröfu kaupenda fasteignar um bætur úr starfsábyrgðartryggingu fasteignasalans sem hafði milligöngu um kaupin. Vildi kaupandinn meina eftir kaupin hefðu komið í ljós umfangsmiklir gallar á eigninni sem fasteignasalinn hafi ekki upplýst hann um. Kaupendurnir höfðu áður tapað dómsmáli gegn seljanda eignarinnar og sitja því eftir án þess fá nokkrar bætur vegna gallanna.
Fram kemur í úrskurðinum að kaupendurnir hafi keypt fasteignina fyrir milligöngu fasteignasalans árið 2021. Við skoðun á eigninni hafi kaupendur fengið afhenta ástandsskýrslu frá árinu 2016 og að þær upplýsingar hafi fylgt að búið væri að laga allt sem upptalið væri í skýrslunni, utan þess að mála þak og glugga á efri hæð. Í kauptilboði kom fram að kaupendur væru meðvituð um að gluggar eignarinnar væru í lélegu ástandi og að eignin þarfnaðist endurbóta. Áður en kauptilboðið var gert fengu kaupendur söluyfirlit frá fasteignasalanum. Í því kom fram að honum hafi ekki verið bent sérstaklega á galla á eigninni, ekki lægi fyrir vitneskja um ástand vatns- og frárennslislagna, raflagna og glers. Daginn eftir samþykkt kauptilboðs, varð vart við leka í eigninni sem kaupendur voru upplýst um í framhaldinu.
Gallar
Ýmsir gallar á eigninni komu í ljós eftir kaupin, svo sem mikill raki og mygla í gólfi og veggjum víðs vegar um eignina. Þakið reyndist vera í slæmu ástandi og haldið umfangsmiklum göllum. Bæði fyrir og eftir afsalsfund höfðu kaupendur orðið fyrir vör við ýmis konar annmarka á eigninni.
Í kjölfarið höfðuðu kaupendurnir mál á hendur seljanda. Vitnar nefndin í dóm héraðsdóms en þar komi m.a. fram að samkvæmt mati verkfræðistofu myndi kostnaður við lagfæringar á þaki, gluggum og tréverki, viðgerðum innanhúss og lögnum nema 24,3 milljónum króna. Í framhaldinu hafi seljanda verði sent bréf þar sem settar voru fram kröfur vegna ætlaðra galla á eigninni. Þeim kröfum hafnaði seljandinn en í kjölfarið var dómkvaddur matsmaður sem mat ástand eignarinnar. Eftir að hann skilaði matsgerð gerðu kaupendur kröfu um að seljandinn bætti þeim tjónið sem metið hafi verið í matsgerðinni.
Stefndu kaupendur seljanda fyrir héraðsdóm og kröfðust bóta eða afsláttar af kaupverði. Voru kaupendunum dæmdar bætur að hluta vegna þeirra krafna sem þeir gerðu. Seljandinn áfrýjaði hins vegar til Landsréttar sem sýknaði hann af öllum kröfum.
Á síðasta ári gerðu kaupendurnir kröfu í starfsábyrgðartryggingu fasteignasalans á þeim grundvelli að hann hefði vanrækt skyldur sína með ófullnægjandi upplýsingagjöf til þeirra. Þau hafi ekki fengið hjá honum upplýsingablað seljanda og hann fullyrt ranglega að búið væri að gera við allt sem væri að eigninni. Tryggingafélagið hafnaði hins vegar bótaskyldu á þeim grundvelli að krafa kaupendanna væri fyrnd. Krafan hefði verið lögð fram meira en fjórum árum eftir að hið meinta tjón hafi komið í ljós. Vildi tryggingafélagið einnig meina að fasteignasalinn hefði ekki veitt rangar og ófullnægjandi upplýsingar.
Hlutverkið
Kaupendurnir sögðust hins vegar ekki hafa uppgötvað hversu mikill hlutur fasteignasalans hefði verið í málinu fyrr en að dómur Landsréttar féll. Þar af leiðandi væri krafa þeirra ekki fyrnd þar sem þau hefðu ekki haft vitneskju um hversu miklu tjóni fasteignasalinn hefði valdið.
Úrskurðarnefnd í vátryggingamálum segir í sinni niðurstöðu að samkvæmt gögnum málsins hafi kaupendunum orðið kunnugt um gallana á eigninni fljótlega eftir samþykkt kauptilboðs og afhendingu eignarinnar árið 2021. Telur nefndin að kaupendurnir hafi verið orðin meðvituð um gallana í seinasta lagi þegar minnisblað verkfræðistofunnar, sem þau fengu til að meta ástand eignarinnar, hafi legið fyrir. Þegar minnisblaðið hafi legið fyrir hafi því fyrningarfrestur, sem samkvæmt lögum um fyrningu kröfuréttinda sé fjögur ár, verið liðinn.
Þegar kaupendurnir hafi lagt fram kröfu um bætur úr starfsábyrgðartryggingunni hafi hún þar af leiðandi verið fyrnd.
Kaupendurnir fá því engar bætur greiddar þrátt fyrir umfangsmikla og kostnaðarsama galla á eigninni.
