Veitingamaður í Stykkishólmi segir tilfærslu Breiðafjarðarferjunnar Baldurs reiðarslag fyrir ferðaþjónustu í bænum. Ferjan, sem alla jafna siglir yfir Breiðafjörð, hefur siglt á milli lands og Vestmannaeyja síðan í júní vegna bilunar í Herjólfi.
„Þetta er að hluta til lífæðin hérna yfir fjörðinn og út í Flatey og á suðurfirði Vestfjarða, þannig að þetta hefur gríðarlega mikið að segja ekki bara fyrir okkur heldur Vestfirðinga líka,“ segir Sæþór Þorbergsson sem rekur veitingastaðinn Narfeyrarstofu í Stykkishólmi.
„Hluti af þessu fólki sem fer með ferjunni gistir, það nýtur kvöldsins og eyðir deginum hérna jafnvel, kemur kannski um hádegi og fer svo með ferjunni daginn eftir. Þetta er mikið skarð höggið.“
Vegagerðin segir Baldur eiga að snúa aftur til Breiðafjarðar fyrir næstu mánaðamót. Búið er að gera við vél fyrir Herjólf og hún er á leið til landsins.
Færri ferðamenn en sami fjöldi starfsfólks
Sæþór er annar höfunda greinarinnar Baldur til Eyja og við borgum sem var birt á Vísi í morgun.
Hann segir tilfærslu ferjunnar hafa leitt til mikils samdráttar hjá fyrirtækjum sem veita ferðamönnum þjónustu í Stykkishólmi, einkum þeim sem bjóða upp á gistingu og veitingar.
Dæmi séu um allt að 30% samdrátt hjá ferðaþjónustufyrirtækjum í bænum í sumar.
„Það er búið að ráða inn í fyrirtækin starfsfólk og miðað við starfsemina eins og hún er búin að vera undanfarin ár og svo bregðast forsendurnar. Við fáum miklu minni traffík og þá ertu bara með fólk inni sem hefur ekki verkefni,“ segir Sæþór.
„Það veit hver einasti maður sem einhvern tímann hefur borgað laun að þetta gengur ekki upp. Þetta er stærsti kostnaðarliðurinn í rekstri fyrirtækja í ferðaþjónustu, þetta er mannaflsfrekur rekstur og ef þú hefur ekki tekjurnar á móti þá ertu bara kominn í mikil vandræði. Það er borðleggjandi.“
Skapar neikvæða upplifun
Breytingin hefur einnig neikvæð áhrif á upplifun ferðamanna sem gera sér ferð í Hólminn.
„Þetta hefur náttúrlega gríðarleg áhrif, þegar fólk er komið hérna í bæinn og hefur ekki fengið réttar upplýsingar. Það er jafnvel búið að panta gistingu og ætlaði að fara að taka skipið yfir, koma við í Flatey og halda áfram á Suðurfirðina,“ segir Sæþór.
„Þetta er svo mikil neikvæðni og fólk fer héðan með slæma upplifun. Það er nú bara mantran í ferðaskrifstofunni, eins og hjá okkur hér, að það er alveg sama hvar fólk sest að eða verslar eða sefur – það má enginn fara óánægður út úr umhverfinu okkar. Það hefur slæm áhrif og þetta er að hafa alveg gríðarleg áhrif á það. Þannig að hver einasti aðili sem fer héðan með slæma upplifun. Það er ekki að hjálpa okkur til framtíðar.“
Særún, ferja Sæferða, siglir á milli Flateyjar og Stykkishólms í fjarveru Baldurs.
„Í ofanálag voru Sæferðir að byrja aftur núna í vor eftir stopp í eitt ár. Eitt ár í ferðaþjónustu hefur talsverð áhrif, þá leitar ferðaskrifstofan lausna annars staðar. Það þarf þunga til að koma inn aftur og það tekur nokkur ár. Sæferðabáturinn er orðinn rúta út í Flatey til að ferja fólk þangað og vistir og hluta af vatni. Eyjan er búin að vera að glíma við að vera hálf vatnslaus og fólk hefur varla getað verið þarna af því að það er meira að segja varla hægt að sturta niður úr klósettum.“
Baldur og Herjólfur siglt á milli lands og Eyja
Sæþór furðar sig á því að Baldur sé látinn sigla á milli lands og Eyja þegar Herjólfur er enn sjófær. Þá telur hann skynsamlegra að gert verði við gamla Herjólf svo hægt sé að nýta skipið þegar þörf er á.
„Ef þörfin er svo mikil að bæði Baldur og Herjólfur þurfa að vera á stöðugum siglingum, af hverju eru þá ekki bæði Herjólfsskip í siglingum? Af hverju er verið að taka Baldur í það verkefni? Ég tek fram að við erum ekki á móti því að Vestmannaeyingar fái góðar samgöngur. Það er ekki mantran okkar. Það er bara ekki hægt að höggva svona skarð á milli fólks, að taka þessa lífsbjörg sem bæði við hér og Suðurfirðingarnir hafa. Þetta er ótrúleg ráðstöfun,“ segir Sæþór.
Hann er viss um að Baldur snúi ekki aftur fyrr en eftir verslunarmannahelgi.
„Auðvitað vilja Vestmannaeyingar halda Baldri þangað til að það er búið að ferja alla gesti Þjóðhátíðar fram og til baka. Ég geri ekki ráð fyrir því að hann verði kominn hingað fyrr en eftir Þjóðhátíð. Þá er náttúrlega sumarið bara búið hér,“ segir Sæþór.
„Þetta er alveg vonlaus ráðstöfun með engum fyrirvara að gera þetta eins og þetta var gert núna.“
G. Pétur Matthíasson, upplýsingafulltrúi Vegagerðarinnar, segir að Baldur eigi eftir að hætta að sigla á milli lands og Eyja fyrir mánaðamót eða jafnvel á næstu dögum. Mótorinn sé á leið til landsins og það taki aðeins nokkra daga að setja hann í skipið.
Spurður um hvort Breiðfirðingar megi vænta þess að missa Baldur aftur til Eyja segist G. Pétur ekki geta sagt til um það. Ferjan verði þó áfram varaskip Herjólfs.
Nauðsynlegt hafi verið að hafa Breiðafjarðarferjuna fyrir sunnan í sumar þar sem Herjólfur geti ekki lagt frá Landeyjarhöfn í miklum austanvindi. Skipið hafi ekki nægilegt afl til að gera það ef það gengur einungis á annarri vélinni.
