Tveggja barna móðir í Vogum á Vatnsleysuströnd hefur þungar áhyggjur af stöðu leikskólamála í bænum. Hún óttast að sonur hennar fái ekki leikskólapláss fyrr en rétt fyrir þriggja ára aldur og það geti leitt til þess að hún þurfi að segja upp starfi sínu. Hefur hún gengið í gegnum viðlíka hremmingar með dóttur sína sem nú hefur blessunarlega fengið leikskólapláss.
Móðirin, sem óskaði þess að njóta nafnleyndar í fréttinni, segist lengi hafa beðið eftir leikskólaplássi fyrir dóttur sínar í Njarðvík:
„Dóttir mín, fædd 2023, var á leikskóla í Njarðvík þegar við fluttum. Hún fékk þar pláss aðeins stuttu áður en við fluttum eftir mjög langa bið og var þá að verða þriggja ára. Sú bið hafði gríðarlega erfiðar fjárhagslegar afleiðingar fyrir okkur þar sem við þurftum að brúa tímabilið án leikskólapláss og með takmörkuð úrræði. Með mikilli fyrirhöfn fengum við undanþágu frá Reykjanesbæ og Vogum til að hún gæti klárað árið þar til júlí 2026. Í apríl 2026 fékk hún loksins pláss í Vogunum og byrjar þar í ágúst.“
Sonur konunnar er fæddur árið 2024 en er ekki kominn með leikskólapláss í Vogum og telur hún fyrirsjáanlegt að töluverð bið verði eftir plássi:
„Leikskólinn í Vogunum auglýsir það að börn fái pláss frá 18 mánaða aldri, þetta má sjá á vefsíðunni hjá þeim. Sonur minn fékk ekki pláss núna í ágúst n.k. og samkvæmt upplýsingum frá leikskólanum eru litlar líkur á að hann fái pláss í janúar 2027 og raunhæft að hann fái ekki pláss fyrr en í ágúst 2027, þá orðinn tæplega þriggja ára.“
Hún óttast að vandræðin vegna plássleysis fyrir dóttur hennar séu að fara að endurtaka sig:
„Þetta þýðir að sama staða gæti endurtekið sig. Ég gæti þurft að hætta í vinnunni með gríðarlegu tekjutapi og alvarlegum afleiðingum fyrir fjölskylduna. Ég hef ekki bakland til að passa barnið, flestir dagforeldrar taka ekki börn á þessum aldri og ekki er boðið upp á aðrar lausnir.“
Hún bendir á að aðeins einn leikskóli sé starfandi í Vogum. Íbúar þar voru um 1.400 árið 2023 og hefur farið fjölgandi.
„Sveitarfélagið hefur stækkað hratt og verið að laða að fjölskyldur, en þjónustan hefur ekki fylgt eftir. Foreldrar standa eftir í algjörri óvissu og þurfa í sumum tilfellum að hætta í vinnu einfaldlega vegna þess að ekki er til staðar leikskólapláss,“ segir konan enn fremur og bendir á að málið snerti miklu fleiri en hana:
„Þetta er ekki aðeins persónulegt mál, þetta er samfélagslegt vandamál. Það getur ekki talist eðlilegt að foreldrar missi vinnu vegna skorts á leikskólaplássi og hafi engin önnur úrræði. Fjölskyldur þurfa fyrirsjáanleika og raunverulegar lausnir, ekki óvissu sem hefur bein áhrif á lífsviðurværi þeirra. Svona staða á ekki að koma upp árið 2026.“
Stefna á að leysa vandann
DV sendi fyrirspurn um málið til Hólmfríðar J. Árnadóttur, sviðsstjóra fjölskyldusviðs Sveitarfélagsins Voga. Segir Hólmfríður í svari sínu að kapp sé lagt á að leysa þennan vanda:
„Við fyrstu úthlutun leikskólaplássa í Heilsuleikskólanum Suðurvöllum fyrir haustið náðist því miður ekki að uppfylla viðmið sveitarfélagsins um að öll börn 18 mánaða og eldri fengju pláss. Allt kapp er nú lagt á að vinna að lausn til þess að svo megi verða en of snemmt að segja til um í hverju hún er fólgin.
Foreldrar barna sem orðin verða 18 mánaða og eldri í haust, verða á næstunni upplýstir um framvindu málsins. Við erum meðvituð um að þetta kemur sér illa fyrir fjölskyldur sem bíða og munum kappkosta að leysa úr málinu eins fljótt og kostur er.“
