Formaður Félags fasteignasala segir meiri gang vera á fasteignamarkaði en fréttaflutningur bendi til. „Ég er ekki að upplifa frost, alls ekki. Það er erfitt ástand en það eru fasteignir að seljast alla daga,“ segir Monika Hjálmtýsdóttir.
Erfitt ástand hefur þó í för með sér að fólk reynir að finna nýjar og óhefðbundnari leiðir til að láta samninga ganga upp.
Til dæmis hefur borið á því að fólk reyni í auknum mæli að gera með sér svokallaða makaskiptasamninga. „Auðvitað er meira verið að reyna þá leið, en það er ekki endilega að það gangi upp,“ segir Monika. „Fólk er að reyna að finna leiðir til að eiga í fasteignaviðskiptum.“
Fasteignir seljast á hverjum degi
Monika segir erfitt ástand ekki koma í veg fyrir það að fasteignir á öllum verðbilum seljist á hverjum degi. „Sem kemur í raun og veru sjálfri mér á óvart og sennilega öðrum fasteignasölum.“
Það að fólk eigi í viðskiptum þrátt fyrir núverandi árferði þykir Moniku vera til marks um traust á fasteignamarkaðnum, sem hún segir vera jákvætt.
„Það er eins og fólk hafi, þrátt fyrir erfitt ástand, trú á markaðnum. Fólk getur ekki beðið endalaust, fólk þarf og er að eiga í viðskiptum,“ segir hún.
Undirliggjandi eftirspurn er mjög mikil, enda lánaframboð takmarkað og stýrivextir háir. „Það eru margir sem þurfa og vilja kaupa sér fasteignir. Það er stór hópur sem væri miklu stærri ef það væri ekki svona hátt vaxtastig og þröng lántökuskilyrði,“ segir Monika.
