Edda Björg, Helga Braga og Álfgrímur skemmtu sér - MBL.IS

Sviðslistaverðlaunin Gríman fór fram í gærkvöldi í Þjóðleikhúsinu. Leikarar og leikstjórar, búningahönnuðir og ljósamenn geisluðu af þokka þetta kvöld. Öllu var til tjaldað til þess að hafa gaman. Sumir felldu grímuna, aðrir ekki! 

Þórunn Elísabet Sveinsdóttir búningahönnuður og listakona var sæmd heiðursverðlaunum. 

Hún hannaði búninga fyrir kvikmyndirnar 101 Reykjavík, Hafið og Ikingut og skapaði listræna áferð leikmynda í sjónvarpsverkum á borð við Ófærð og Eiðinn. Listakonan hefur sex sinnum verið tilnefnd til Grímunnar fyrir búningahönnun og hlotið verðlaunin þrisvar; fyrir Rómeó og Júlíu í uppsetningu Vesturports og Leg og Sjö ævintýri um skömm í Þjóðleikhúsinu.

Hún kom einnig að sýningum sem hlutu Grímuverðlaun sem barnasýningar ársins, meðal annars Klaufum og kóngsdætrum og Leitinni að jólunum. Auk þess að starfa í sviðslistum hefur Þórunn Elísabet tekið að sér sýningarstjórnun, meðal annars fyrir Þjóðminjasafnið, Árbæjarsafn, Gljúfrastein, Gerðuberg, Safnasafnið og Listasafnið á Akureyri.