Danska leyniþjónustan sagði í dag að Íran gegndi stærra hlutverki þegar kæmi að hryðjuverkaógn gegn Norðurlandaríkinu og bætti við að hættumatið endurspeglaði alþjóðlega þróun.
Danska öryggis- og leyniþjónustan, PET, sagði að heildarógnin gagnvart Danmörku væri áfram á fjórða stigi af fimm en bætti við að á undanförnum árum hefði ógnin breyst verulega að eðli.
„Á síðasta ári hafa ríki orðið sífellt mikilvægari fyrir hryðjuverkaógnina. Við metum það svo að þetta eigi sérstaklega við um Íran, sem ógnar sérstaklega ísraelskum og gyðinglegum hagsmunum auk ákveðinna íranskra andófsmanna í Evrópu, þar á meðal Danmörku,“ sagði Finn Borch Andersen, yfirmaður PET, í yfirlýsingu.
Hann segir að ógnin frá Íran stafi af írönskum leyniþjónustum sem nýti sér bæði glæpanet og nýliðun útsendara í Evrópu til að skipuleggja og framkvæma árásir.
Sænska öryggisþjónustan (Säpo) hefur einnig sakað Íran um að nota glæpagengi til að fremja ofbeldisverk gegn ísraelskum hagsmunum og írönskum stjórnarandstæðingum í Svíþjóð.
Að sögn PET hefur aukinn fjandskapur milli Írans og Ísraels á undanförnum árum, og frá því að Ísrael og Bandaríkin hófu árásir á Íran í febrúar, haft áhrif á hættustigið gagnvart Danmörku og um öll Vesturlönd.
