Bandaríkjaher gerði í kvöld loftskeytaárásir á nokkur skotmörk í Íran, þrátt fyrir vopnahlé. Þetta kemur fram í tilkynningu frá miðstjórn Bandaríkjahers (CENTCOM) á samfélagsmiðlinum X í kvöld. Í tilkynningunni segir að árásirnar séu gerðar í kjölfar árása Írana á þrjú flutningaskip við Hormússund síðastliðinn sólarhring.
Sprenginga hefur orðið vart í suðurhluta Íran, samkvæmt ríkisfjölmiðlum þar í landi. Íranski miðillinn IRIB segir að árásirnar hafi meðal annars beinst gegn fjarskiptamastri í Bandar Abbas en einnig varð sprenginga vart í Sirik og á Qeshm-eyju.
Þá hafa undanþágur frá viðskiptaþvingunum Bandaríkjanna gegn Íran verið dregnar til baka. Undanþágurnar, sem snéru að sölu á íranskri olíu, voru hluti af vopnahléssamkomulagi ríkjanna. Íranar hafa fordæmt afturköllun undanþáganna og segja þær skýr brot á vopnahléssamkomulaginu.
CNN hefur eftir bandarískum embættismanni að árásir Bandaríkjanna séu „ekki í réttu hlutfalli“, þær séu gerðar í refsingarskyni og að „þessu muni ekki ljúka í bráð“.
Fréttin hefur verið uppfærð með nánari upplýsingum um skotmörk árásanna
