Hallur Hallsson skrifar:

Ólafur Ragnar Grímsson forseti Íslands 1996-2016 flutti ávarp til Íslendinga á stofnfundi "Áfram Ísland" fyrir troðfullum sal í gamla sjálfstæðishúsinu við Austurvöll mánudaginn 6. júlí 2026. Ávarpið markaði upphaf frelsisbaráttu samtakanna nú þegar þjóðin er esbuð til þess að samþykkja einveldi embættismanna í Brüssel. Árið 1848 flutti Jón forseti Sigurðsson [1811-1879] hugvekju til Íslendinga. Danakonungur hafði afsalað sér einveldi og nýr konungur tekið við; Friðrik hinn sjöundi. Jón forseti vitnaði í Eddukvæði. Dagur er upp kominn / dynja hana fjaðrir / mál er vílmögum / að vinna erfiði.Sótt væri að þjóðinni sem þyrfti að sækja frelsi; vinna erfiði. Jón forseti hvatti þjóð sína til að vera ekki “viljalaus skepna“ í höndum embættismanna. 

Jón forseti skrifaði m.a: "Danmörk teymir Ísland eptir sér í bandi og skammtar því réttindi, frelsi og menntun eptir því sem henni þykir hagkvæmast og bezt við að eiga."

Embættismenn stjórna viljalausum skepnum

Hugvekjan birtist í Nýjum félagsritum þegar landsmenn voru innan við sextíu þúsund. Alþingi hafði verið endurreist 1845 orðið vettvangur rökræðu í landinu. Alþingi elsta þjóðþing veraldar stofnað 930. Jón forseti skrifaði: “Þjóðin er ekki til handa embættismönnum sínum, heldur eru þeir handa henni; hún á því með að krefja þá reikningskapar fyrir stjórn þeirra, og þeir eiga að svara; en hér verður þjóðin öldungis þýðíngarlaus, nema ef það gæti verið embættismönnum til æfingar, að stjórna viljalausum skepnum, og sýna þeim hversu miklir þeir væru.“ Þjóðfundur var haldinn 1851 til þess að ræða stjórnskipan Íslands. Alþingi Íslendinga átti að verða amtráð í dönsku héraði og landsmenn fá sex fulltrúa á danska þinginu. “Vér mótmælum allir,“ sögðu þingmenn þegar þeir höfnuðu tillögu Trampe greifa um innlimun Íslands í konungsríkið Danmörku. Trampe greifi reiddist og sleit fundi. Jón forseti blés fólkinu í landinu bjartsýni í brjóst. Íslendingar fengu Stjórnarskrá 1874, Heimastjórn 1904, fullveldi 1918 og sjálfstæði 1944.

Vílmögum haldið frá rökræðu

Þann 19. júní 2026 var Alþingi Íslendinga slitið þegar til umræðu var mesta breyting á stjórnskipan Íslands í sögu íslenska lýðveldisins. Utanríkisnefnd bárust yfir 100 umsagnir, þar á meðal frá Landskjörstjórn, Feneyjarnefnd, Lagastofnun og Hagfræðistofnun. Bak við luktar dyr í svokölluðu leyniherbergi Alþingis eru sögð hundruð skjala um samtöl embættismanna sem þjóðin fær ekki aðgengi að. “Esb-gögn verða ekki kynnt almenningi,“ segja fjölmiðlar. Vílmögum er haldið frá rökræðu.  Alþingi verður amtráð sambærilegt því sem Trampe greifi stefndi að 1851. Liðin eru 175 ár frá því Trampe sleit Þjóðfundinum í Lærða skólanum. Nú er stefnt að einveldi embættismanna í Brüssel.

Verndari íslenska lýðveldisins

Ávarp Ólafs Ragnars markar þáttaskil í eilífri sjálfstæðisbaráttu Íslendinga. Ólafur lýsti hollustu við íslenska lýðveldið í gamla sjálfstæðissalnum; “...Mér er ekki sama um lýðveldið.“ Ólafur Ragnar hefur tekið stöðu sem verndari íslenska lýðveldisins. Ólafur talaði um fórnir fyrri kynslóða og framtíð komandi kynslóða. Ólafur minnti á sókn Íslands úr fátækt til velsældar. Velgengni Íslands væri eitt af þjóðarævintýrum 20. aldar. “Af hverju U-beygja,“ spurði forsetinn. Þetta leiðir af sér aðra spurningu. Af hverju einveldi embættismanna?

Fæddist undir dönskum kóngi

Ólafur Ragnar Grímsson fæddist vorið 1943 undir dönskum kóngi Kristjáni X. Hann ólst upp við breska togara fyrir vestan. Í gildi var samningur Dana og Breta sem höfðu skipt á beikoni til Bretlands fyrir þorsk í flóum og fjörðum, saminn 1901 af embættismönnum bak við luktar dyr í Lundúnum. Samningurinn illræmdi rann út 1951. Strax 1952 lýsti íslensk þjóð yfir 4 mílna landhelgi, svo 12 mílum, þá 50 mílum og 200 mílur unnust 1976. Efnahagslögsagan nær suður fyrir Bretland. Þjóðin virkjaði fallvötnin og beislaði heita vatnið. Ávarp Ólafs Ragnars 2026 kallast á við hugvekju Jóns forsetasem benti á útgönguleið Íslendinga þegar þeir gengu Noregskonungi á hönd með Gamla sáttmála: "Halda skulum vér ok vorir arfar allan trúnað við yður meðan þér ok yðrar arfar halda trúnað við oss." Ef konungur standi ekki við Gamla sáttmála væru Íslendingar lausir allra mála. Ólafur Ragnar minnti á að málskotsréttur yrði tekinn af íslenskri þjóð. Jón forseti sagði að með afnámi einveldis í Danmörku 1848 hefði verið leystur sá knútur sem hefði þótt svo fast riðinn, að væri jafnvel gjörður handa eilífðinni. Ólafur Ragnar vísaði tvívegis illa þokkuðum Icesave-samningum til þjóðaratkvæðis 2010-2011. Icesave-sinnar leituðu hefnda. Þeir sóttu að Ólafi Ragnari í forsetakosningum 2012 en hann vann öruggan sigur.

Risaveldi Bandaríkja Evrópu

Nú banka þeir á dyr sem forðum kúguðu Íslendinga. Já-fólk esbar þjóðina í sumarleyfi sínu til að kinka kolli til samþykkis. Sýn utanríkisráðherra markast ekki af framtíð Íslands heldur stórveldisdraumum fyrir hönd Esb: “Evrópusambandið er risaveldi sem á að haga sér eins og risaveldi,“ sagði ÞKG í viðtali við Europe Today. Evruland verða Bandaríki Evrópu, Brüssel verður höfuðborg Íslands. Sýn ríkisstjórnar Íslands í nánustu framtíð markast af hervæðingu Íslands sem birtist í frumvarpi 114/2025 sem veitir ríkislögreglustjóra vald á stríðstímum til að senda 18+ ára karla og konur á vígvelli [Esb/Rússó] styrjaldar, gr. 44-46. 

Ræðu Ólafs Ragnars má sjá hér neðar og byrjar um miðjan fundinn: