Ásum hf., móðurfélagi Símans, barst í dag andmælaskjal frá Samkeppniseftirlitinu vegna fyrirhugaðra kaupa á öllu hlutafé í fyrirtækjunum Opnum kerfum og Öryggismiðstöð Íslands. Frummat eftirlitsins sé að íhlutun sé nauðsynleg vegna kaupanna.
Í tilkynningu Ása í kvöld segir að skjalið feli ekki í sér bindandi stjórnvaldsákvörðun og sýni ekki endanlega afstöðu til kaupanna, heldur sé það liður í rannsókn málsins og gefi félaginu tækifæri fyrir 25. september til að koma fram með skýringar, athugasemdir og gögn áður en ákvörðun verði tekin.
Tilkynnt var um samkomulagið í desember í fyrra og Ásar sendu inn samrunatilkynningu vegna beggja fyrirtækjanna í apríl og maí. Samkeppniseftirlitið hefur til 9. október til að ljúka rannsókn á kaupum Ása á Öryggismiðstöðinni og til 4. nóvember hvað snertir Opin kerfi.
Andmælaskjal frá Samkeppniseftirlitinu er formleg greinargerð sem inniheldur frummat þess á máli sem það hefur til rannsóknar. Með því lýsir eftirlitið helstu atvikum og þeim samkeppnishindrunum sem það telur geta átt sér stað.
Fyrirtækinu sem hlut á að máli gefst tækifæri til að rökstyðja sína hlið, koma með ný gögn og leiðrétta mögulegan misskilning. Að því búnu getur Samkeppniseftirlitið breytt matinu, fellt málið niður eða gefið út bindandi stjórnvaldsákvörðun.
