Þorpið í Reykholti í Biskupstungum í Bláskógabyggð er orðið hundrað ára gamalt og hefur því verið fagnað með afhjúpun söguskilta. Í dag búa um fimm hundruð manns í þorpinu og fer þeim sífellt fjölgandi. Reykholt er öflugasta garðyrkjusvæði landsins en í sumar verða byggð um fimm þúsund fermetrar af nýjum gróðurhúsum í þorpinu.
100 ár eru nú liðin frá því að Jón Halldórsson gaf Biskupstungnahreppi land og fé til að reisa barnaskóla við Reykholtshver, en sá gjafagjörningur 20. maí árið 1926 er talinn upphaf byggðarinnar í Reykholti.
Saga Reykholts tengist jarðhitanum á svæðinu mjög mikið en þar er stunduð ylrækt af miklum myndarskap. Sveinn Sæland, garðyrkjubóndi á Espiflöt í Reykholti þekkir söguna og allt í kringum Reykholt manna best. Í sérstakri göngu um Reykholt í tilefni afmælisins voru söguskilti afhjúpuð.
„Já, við afhjúpuðum söguskilti, sem við erum búin að vera með lengi í smíðum, og síðan bráðsmellin stytta af karlinum, sem við búum til eftir ljósmynd. Þetta er mannhæðar há stytta, skilti eiginlega, sem okkur þykir mjög vænt um,” segir Sveinn.
Mikil uppbygging hefur verið í Reykholti síðustu ár enda spretta húsin upp eins og gorkúlur.
„Það tók okkur þrjú ár að hanna þetta og forma þorpið og á þeim tíma held ég að það hafi aukist um 200 manns hérna í sveitinni og núna erum við tæp 500 manns. Reykholt er gríðarlega fjölbreyttur staður í dag. Það byggir á mjög traustum rótum, hérna er garðyrkjan í öndvegi og þetta er mikið þjónustusvæði í kringum skólann, Aratungu og verslun og þjónustu,” segir Sveinn.
Sveinn segir ótrúlegan vöxt í garðyrkju í Reykholti.
„Já, hérna eru gríðarlega öflugir einstaklingar sem reka garðyrkju og við erum stolt að segja það að þetta sé öflugasta garðyrkjusvæðið á landinu orðið. Hér er bara í sumar verið að byggja fimm þúsund fermetra í gróðurhúsa fermetrum.”
