Karl III Bretakonungur ávarpaði bandaríska þingið í kvöld en hann er í heimsókn í Washington. Í ávarpinu hvatti Karl Bandaríkin til að standa þétt við vestræna bandamenn sína, þar sem ágreiningur vegna Írans og Úkraínu gæti grafið undan tengslum yfir Atlantshafið.
„Þær áskoranir sem við stöndum frammi fyrir eru of stórar til að nokkur þjóð geti borið þær ein,“ sagði hann. „Hver sem ágreiningur okkar er, hvaða ósætti sem við kunnum að hafa, stöndum við sameinuð í skuldbindingu okkar til að halda uppi lýðræðinu.“
Samband fætt í deilum
Tilefni heimsóknarinnar er að 250 ár eru frá því að Bandaríkin fengu sjálfstæði frá Bretlandi. Þá er stefnt að því að reyna að treysta samband þjóðanna, sem hefur reynt á undanfarnar vikur.
Karl lagði áherslu á söguleg tengsl þjóðanna tveggja og sagði samband þeirra hafa „fæðst í deilum, en væri ekki síður sterkt fyrir vikið.“ Þá sagðist hann vona af öllu hjarta að ríkin tvö myndu halda áfram að verja sameiginleg gildi sín og hunsa háværar kröfur um að einangra sig.
Karl minntist einnig á Úkraínu í ávarpi sínu. Til að tryggja réttlátan og varanlegan frið þarf að hans sögn staðfestu og einbeitni.
Trump lagði áherslu á vináttu
Í ræðu sinni lagði Trump áherslu á vináttu við Bretland, hrósaði sambandi þjóðanna og sagði Bretland nánasta bandamann Bandaríkjanna.
„Gáfur, ástríða og tryggð hans hátignar hafa lengi verið sannkölluð blessun fyrir bresku þjóðina. En ekki aðeins fyrir hans eigin þjóð, heldur einnig fyrir hjartkær tengslin milli Bandaríkjanna og Bretlands. Og ég er sannfærður um að svo verði lengi til framtíðar,“ sagði Trump.
Mikil öryggisgæsla í kjölfar skotárásar
Karl III Bretakonungur kom til Bandaríkjanna í gær og hitti þá meðal annars Trump í Hvíta húsinu. Kvöldinu var svo eytt í garðveislu í breska sendiráðinu. Í dag hittu konungshjónin Trump og forsetafrúna að nýju þar sem hátíðleg móttaka fór fram.
Mikil öryggisgæsla hefur verið í kringum heimsóknina en á laugardaginn var skotárás á kvöldverði Samtaka blaðamanna Hvíta hússins.
