Ný könnun mennta- og barnamálaráðuneytisins leiðir í ljós að að kjarnaefni sem komið er til ára sinna sé enn burðarás stærðfræðikennslu á Íslandi.
Guðjón Hreinn Hauksson, formaður Félags framhaldsskólakennara, segir námsefnaskort hafa verið viðvarandi vandamál í íslensku skólakerfi um áratugaskeið og að ánægjulegt sé að sjá stjórnvöld fara í það verkefni að bæta þar úr skák.
Gervigreind ekki heildarlausn
„Þau verða samt sem áður að átta sig á því að einhver skemmri skírn í þeim efnum er ekki í boði,“ segir Guðjón í samtali við mbl.is.
„Gervigreind getur komið að gagni en hún getur ekki verið heildarlausn og það sama á við um þýðingar úr erlendu námsefni, þær geta verið hluti af leiðinni til bóta en mikilvægast er að staðið verði faglega að málum og fjárfest í tíma fagfólks til þess að vinna þessa vinnu, hanna efni frá grunni og aðlaga og staðfæra námsefni sem til kann að vera,“ bætir hann við.
Gott námsefni þarf í öllum greinum
Á Íslandi sé fjöldi námsgagnahöfunda með mikla reynslu og þekkingu sem styðja þurfi til góðra verka.
„Það hefur verið reynt að snúa athygli ráðamanna að þessum skorti á námsgögnum undanfarið og það virðist hafa haft einhver áhrif. Það er gríðarlega mikilvægt að gott námsefni sé í öllum skólum landsins og það á ekki bara við um stærðfræði.“
