Fréttavakt um tónlistarhátíðina Bergmál á Þingvöllum er lokið. Við þökkum samfylgdina í dag og hér er stutt samantekt eftir daginn.
Gestir mættu snemma á tónlistarhátíðina Bergmál á Þingvöllum. Líklega hefur góða veðrið spilað þar inn í og þegar leið á daginn fór umferð að þyngjast til Þingvalla. Farþegar komu bæði í rútum og á einkabílum til Þingvalla. Dagskráin hófst kl. 14.00 og stóð til miðnættis.
Mikill viðbúnaður var á svæðinu hjá lögreglu, viðbragðsaðilum og tónleikahöldurum en þrátt fyrir mikinn mannfjölda gekk allt stóráfallalaust fyrir sig. Umferð frá Þingvöllum hefur gengið greiðlega fyrir sig síðan hátíðinni lauk.
Jökull Júlíusson, söngvari Kaleo, klæddist handprjónuðu axlarskjóli á tónleikunum og að þeim loknum gaf hann Höllu Tómasdóttur, forseta Íslands, axlarskjólið sitt. Hér má sjá myndskeið af því þegar hann gefur Höllu axlarskjólið.
Umferð hefur gengið greiðlega frá Þingvöllum eftir að tónlistarhátíðinni Bergmáli lauk á miðnætti. Að sögn Jóns Gunnars Þórhallssonar, yfirlögregluþjóns hjá lögreglunni á Suðurlandi, er lítill hluti gesta enn á svæðinu en er að týnast þaðan smám saman.
Mikill fjöldi bíla var lagður á bílastæði við Brúsastaði og myndaðist teppa þar fyrr í nótt þegar gestir voru að fara heim á leið. Búið er að leysa það að mestu.
Lögregla og viðbragðsaðilar verða áfram að störfum eitthvað fram eftir nóttu eða þar til síðustu tónleikagestir eru farnir af svæðinu.
Lögreglan á Suðurlandi birti færslu á Facebook þar sem vegfarendur eru beðnir um að sýna þolinmæði og tillitssemi. Mikill fjöldi tónleikagesta er nú á leið til höfuðborgarsvæðisins og því mikilvægt að fylgja leiðbeiningum gæslufólks og lögreglu á svæðinu.
Tilkynning lögreglunnar er svohljóðandi:
Nú þegar líður að lokum tónleikahalda á Þingvöllum reynir á þolinmæði tónlistargesta meðan fjöldinn yfirgefur svæðið. Mikilvægt er að allir sem einn sýni þolinmæði og tillitsemi og fylgi leiðbeiningum sem gæslufólk og lögregla gefa vegfarendum.
Þá er það ekki síður mikilvægt að vera þolinmóður í röðum sem munu myndast og að grípa ekki til ógætilegs framúraksturs á leiðinni heim.
Lögreglan mun halda uppi eftirliti með ölvunar- og fíkniefnaakstri við brottför tónleikagesta.
Lögreglan á Suðurlandi óskar öllum góðrar heimferðar.
Samkvæmt sjúkraflutningamönnum sem eru á Þingvöllum hafa einungis lítilsháttar atvik komið upp og engin alvarleg slys hafa orðið á hvorki tónleikagestum né öðrum á svæðinu fram til þessa. Það þykir gott miðað við þann mikla fjölda sem lagði leið sína á Þingvelli í dag.
Upplýsingar sem birtar voru um að Mosfellsheiði verði lokuð eftir að tónleikum Kaleo ljúki voru ekki réttar.
Lögreglan áréttar að Mosfellsheiði verður opin í kvöld.
Kaleo heldur nú sína seinni tónleika í dag. Ragnar Visage, ljósmyndari, tók þessar myndir af tónleikunum.
Tónleikum Kaleo á að ljúka klukkan 22:30 en dagskránni lýkur þó ekki fyrr en á miðnætti. Á eftir Kaleo spilar KK og Júníus Meyvant bindur svo endahnút á dagskránna.
Hér koma nokkrar myndir frá Bergmáli.
Ragnar Visage ljósmyndari RÚV náði þessu myndskeiði baksviðs á Bergmáli fyrir skömmu. Meðlimir í Kaleo kíktu í matartjaldið til starfsmanna sem fór þannig að þeir tóku lagið með Karlakórnum Fóstbræðrum sem voru að snæða kvöldmat.
Sjón er sögu ríkari.
Tónleikar Emilíönu Torrini hófust klukkan hálf átta. Sólin hefur svoleiðis leikið við söngkonuna sem virðist njóta sín í botn.
Jakob Frímann Magnússon Stuðmaður steig á svið í dag en hann heldur einnig utan um skipulag Bergmáls. Fréttastofa náði tali af honum klukkan 18.
Hann sagði hátíðina hafa gengið fullkomlega fram að þeim tíma.
„Við vonumst til að það haldi áfram að vera fullkomleiki hér í fyrirrúmi, sól og blíða og yndisleg stemning.“
Það var talsverð umræða um regnhlífar og hvort þörf yrði á dulúðlegum veðurbreyti Jakobs Frímanns fyrir hátíðina. Veðrið hefur leikið við tónleikagesti á Þingvöllum í dag.
„Það hefur gengið eins og best hefði mátt óska sér og fyrir það erum við afar þakklát. Bros á hverju andliti,“ segir Jakob Frímann. „Við erum auðvitað bara hálfnuð. Þetta byrjaði svona um hádegisbilið og það er annað eins eftir. Þessu lýkur á miðnætti og við vonum að við fáum áfram gott veður og gott þel.“
Hvernig var að stíga á svið sem Stuðmaður í þjóðgarðinum í dag?
„Það var skemmtilegt. Það var í fyrsta skipti sem Stuðmenn spiluðu í þjóðgarði Íslands og það tókst óskaplega vel. Við vorum með okkar aldavini, karlakórinn Fóstbræður með stjórnandanum Árna Harðarsyni, og svo vorum við með ýmsa óvænta gesti sem komu og glöddu okkur og áhorfendur líka. Þetta er búið að vera mjög skemmtilegt.“
Hljómsveitin Hjálmar steig á svið klukkan 18:30 en tónleikunum er nýlokið samkvæmt dagskrá Bergmáls. Meðlimir Hjálma eru þeir Þorsteinn Einarsson, Guðmundur Kristinn Jónsson, Sigurður Halldór Guðmundsson, Valdimar Kolbeinn Sigurjónsson og Helgi Svavar Helgason.
Hér koma myndir frá tónleikunum.
GDRN var leynigestur og steig á svið með Hjálmum.
Ragnar Visage náði þessari skemmtilegu mynd af forsetahjónunum, Höllu Tómasdóttur og Birni Skúlasyni, og Soffíu Björg. Soffía tók lagið á þriðja tímanum á tónleikunum á Valhallarsviði.
Jón Gunnar Þórhallsson yfirlögregluþjónn á Suðurlandi segir stemninguna á Þingvöllum í dag hafa verið góða og allt gengið smurðulaust.
„Fólk hefur verið mjög jákvætt og mér sýnist hérna yfir hópnum þá er góð stemning yfir öllu. Þannig ég hef ekki yfir neinu að kvarta eins og er en við erum nú að leggja af stað inn í kvöldið og vonum að þetta haldist svona áfram.“
Hér koma myndir frá tónleikum Helga Björns á stóra sviðinu. Samkvæmt dagskrá Bergmáls eru tónleikarnir enn í gangi.
Tónleikum Mugisons á Dynbergi lauk rétt í þessu. Hér eru myndir frá þeim.
Situr þú í bílaröð á leið á Þingvelli?
Ef svo er höfum við áhuga á að heyra frá þér og fá myndir úr bílaröðinni. Endilega hafið samband í frettir@ruv.is.
Athugið að gott er að fá nafn ljósmyndara með myndum og að ef þið sendið okkur ljósmyndir tökum við því sem leyfi til að birta þær á miðlum okkar.
Söngkonan GDRN, Guðrún Ýr Eyjólfsdóttir, steig á svið klukkan 16.
Magnús Jóhann lék undir með GDRN. Þau hafa unnið töluvert saman í gegnum tíðina og gefið út hljómplöturnar Tíu íslensk sönglög og Nokkur jólalög.
Ragnar Visage ljósmyndari RÚV fangaði nýverið myndir af hátíðinni úr lofti með dróna. Hér koma nokkrar þeirra!
Hér koma nokkrar myndir af viðbragðsaðilum á Þingvöllum.
Lögreglan á Suðurlandi er með mikinn viðbúnað í kringum tónleikana en ætla má að um 100 lögreglumenn komi að henni.
Það vakti athygli þegar greint var frá því fyrr í vikunni að bannað væri að taka regnhlífar og tjaldstóla á Bergmál. Veður á Þingvöllum í dag er með ágætum og því verður að teljast hæpið að tónleikagestir sakni regnhlífarinnar.
En hvers vegna er bannað að koma með slíka muni á tónleikana? Fréttastofa náði tali af lögreglu sem sagði það vera af öryggisástæðum.
Það var vitanlega mikið stuð á Þingvöllum þegar Stuðmenn stigu á svið með alþjóðlegum kór fyrir skömmu.
Fréttastofa náði tali af 17 ára piltunum Bjarna Ásberg Þorkelssyni og Lúkasi Viktorssyni á hátíðinni. Þeir eru hluti af stærri hópi sem allir eru klæddir í þema.
„Þegar við fórum að sækja miðana okkar í 66° Norður hittum við á hann Jökul, vin okkar í Kaleo, og spurðum hann um þemað. Það var auðvitað lopapeysur,“ segir Bjarni Ásberg.
„Maður hlýðir Jökli.“
Lögreglan fylgist náið með gangi mála, bæði á hátíðarsvæðinu en umferðareftirlit er einnig umfangsmikið.
Árni Friðleifsson, aðstoðaryfirlögregluþjónn hjá umferðardeild lögreglunnar, var við Hakið þegar rætt var við hann í síðdegisfréttum. Hann segir að umferð gangi hægt en allir komist leiðar sinnar að lokum. Hann segir að búist hafi verið við því að gestir mættu seinna á svæðið. Strax klukkan 13 hafi umferð farið að þyngjast.
Árni biður gesti að hlýða fyrirmælum lögreglu og þá sem eiga pláss í bílastæði að hafa bílastæðamiða sjáanlega í rúðum.
Hér koma fleiri myndir frá Þingvöllum. Á þeim má meðal annars sjá tónleikagesti rölta yfir á tónleikasvæðið og hjónin Sögu Garðarsdóttur og Snorra Helgason á sviði.
Enn er laust á bílastæðinu við Leirur fyrir þá sem eru að koma að austan, að sögn lögreglunnar á Suðurlandi. Einnig er laust á bílastæðinu við Brúsastaði. Önnur bílastæði eru full.
Lokanir á Þingvallavegi tóku gildi klukkan þrjú, þær eru við Grafningsafleggjara vestan við Þingvallavatn, við Uxarhryggjaveg við norðurenda vatnsins og við Miðfell austan við Þingvallavatn. Vegurinn verður lokaður öllum nema þeim sem eiga miða á tónleikana. Takmarkanirnar munu hafa áhrif á umferð, sér í lagi um Mosfellsheiði.
Klukkan 14 í dag var röð í öryggisleit á Þingvöllum ekkert sérstaklega löng og gekk hratt. Eva Björk Benediktsdóttir fréttamaður er á svæðinu. Hún náði tali af öryggisverði sem segir öryggisgæslu hafa gengið mjög vel. Viðbúið sé að röðin eigi eftir að lengjast með deginum og líklegt að hún nái hámarki um 16.
Sumarsólstöður eru lengsti dagur ársins í þeim skilningi að þá er sólin lengst á lofti. Orðið sólstöður vísar til þess að sólin stendur kyrr, hún hættir að hækka eða lækka á lofti.
Sólarupprás á Þingvöllum í dag var klukkan 02:48 og sólarlag verður ekki fyrr en 5 mínútum eftir miðnætti, aðeins örfáum mínútum eftir að tónleikahaldi lýkur.
Formlegar sumarsólstöður eru hins vegar á morgun, 21. júní.
Jól eru kristin hátíð. Hátíðahöld hafa þó verið í norðurhluta Evrópu á vetrarsólstöðum síðan fyrir tíma kristnitöku. Vetrarsólstöður eru um svipað leyti og jóladagur, 21. desember á ári hverju.
Árstíðir á norðurhveli og suðurhveli eru gagnstæðar. Þetta þýðir að á suðurhveli jarðar eru nú vetrarsólstöður.
Gleðilega sólstöðuhátíð!
Hér koma myndir af fyrri tónleikum Kaleo í dag. Þeir hétu Kaleo acoustic og voru með öðruvísi sniði en seinni tónleikar hljómsveitarinnar sem verða klukkan 21-22:30.
Hljómsveitin samanstendur af Jökli Júlíussyni, Davíð Antonssyni, Daníel Kristjánssyni, Þorleifi Gauki Davíðssyni og Rubin Pollock.
Halla Tómasdóttir forseti Íslands ávarpaði hátíðargesti á Þingvöllum.
Egill Tómasson svæðisstjóri var í óðaönn að stýra undirbúningi þegar fréttamaður náði tali af honum í hádeginu. Um þúsund manns eru við störf á hátíðinni, auk nærri 100 lögreglumanna.
„Það er kominn her af fólki að fara í allar stöður, öryggisgæsla og fleira og allir starfsmenn í tæknideildum, matarvagnar, barstaff og annað. Það er mikið „action“ núna, verið að leggja lokahönd á síðustu „díteilin“, þetta lítur mjög vel út,“ segir Egill.
„Það er náttúrulega sól og blíða þannig að fólk þarf ekkert að koma með regnhlífarnar sínar og fólk getur setið í grasinu. Það er dásamleg stemning hérna.“
Tónleikagestir eru farnir að streyma á Þingvelli. Lögreglan á Suðurlandi segir að umferðin sé þétt og gangi rólega en örugglega. Hún hvetur gesti til að sýna þolinmæði og tillitssemi í umferðinni.
Ragnar Visage ljósmyndari RÚV er á Þingvöllum. Hér koma nokkrar myndir frá tónleikasvæðinu.
Kaleo stigu á svið á stóra sviðinu, Dynbergi, rétt í þessu.
Tónleikarnir á Dynbergi eru í beinni útsendingu á Bylgjunni og á vef Vísis. Þá er hægt að horfa á tónleikana í Sjónvarpi Símans í opinni dagskrá.
Dagskráin á stóra sviðinu er svona:
- 14:00- 14:20 - Opnunarathõfn
- 14:30 - 15:00 - Kaleo acoustic
- 15:10 - 15:40 - Stuðmenn
- 16:00 - 16:30 - GDRN
- 16:45 - 17:15 - Mugison
- 17:30 - 18:15 - Helgi Björns
- 18:30 - 19:15 - Hjálmar
- 19:30 - 20:30 - Emiliana Torrini
- 21:00 - 22:30 - Kaleo
- 22:40 - 23:15 - KK
- 23:30 - 24:00 - Júníus Meyvant
Góðan daginn.
Tónlistarhátíðin Bergmál er haldin á Þingvöllum í dag. Hljómsveitin Kaleo er meðal þeirra sem standa að baki tónleikunum. Hún stígur á svið í fyrra skiptið á hátíðinni klukkan 14:30. Að auki við hana koma fram hljómsveitir og tónlistarfólk á borð við KK, GDRN, Júníus Meyvant, Mugison, Helgi Björns og Emiliana Torrini – svo einhver séu nefnd.
Töluverður viðbúnaður er vegna hátíðarinnar en unnið hefur verið að skipulagi hennar í dágóðan tíma. Von er á um 20 þúsund tónleikagestum á Þingvelli í dag. Bergmál er sólstöðuhátíð enda dagurinn lengstur á Íslandi yfir þessa helgi. Sumarsólstöður eru á morgun, 21. júní.
Ég heiti Guðmundur Atli Hlynsson og flyt fregnir frá Þingvöllum í dag.
