Kom þetta fram í færslu sem var birt á Instagram-reikningi hljómsveitarinnar en þar er haft eftir Taylor, sem er 66 ára, að brotthvarfið væri „ein erfiðasta ákvörðun sem ég hef nokkurn tíma þurft að taka“.
Í samráði við lækna
„Að leika á trommur í þessari hljómsveit hefur verið gleði lífs míns,“ stendur þar enn fremur og bætti Taylor við, „og ég mun aldrei geta þakkað aðdáendunum almennilega fyrir þann kærleik sem þeir hafa sýnt okkur í gegnum árin.“
Ákvörðunin hafi verið tekin í samráði við lækna sína en eyrnasuð einkennist af són eða suði í eyrum. Það getur verið bráður eða langvinnur kvilli og þótt það sé oft tiltölulega meinlaus fylgifiskur heyrnarskerðingar getur það í sumum tilvikum verið mjög hamlandi.
Sjaldan tekst að lækna kvillann en hægt er að halda honum í skefjum, en á vef Heilsuveru segir að hægt sé að koma í veg fyrir eyrnasuð af völdum hávaða með því að forðast hávaða og nota hlífar þegar við á.
Tónlistarmenn á borð við söngvaskáldið Neil Young og Chris Martin, forsprakka Coldplay, hafa sagt frá reynslu sinni af kvillanum, er fram kemur í frétt New York Times um málið.
Of mikið og of hratt
Taylor gekk til liðs við Duran Duran skömmu eftir að hún var stofnuð seint á áttunda áratugnum. Hljómsveitin, sem á meðal annars smellina „Hungry Like the Wolf“ og „Girls on Film“, hlaut tvenn Grammy-verðlaun árið 1984 fyrir tónlistarmyndbönd sín.
Árið 1985 hætti Taylor í hljómsveitinni, þá átti hann erfitt með hver hratt sveitin reis upp á stjörnuhimininn.
„Ég hafði farið um borð í 1.000 flugvélar en vissi ekki hvernig ég ætti að fara um borð í eina sem einstaklingur,“ sagði hann í viðtali við NYT árið 2004.
„Ég þurfti að læra að lifa upp á nýtt“
Taylor gekk aftur til liðs við Duran Duran árið 2001 og hefur leikið með hljómsveitinni síðan, meðal annars á nýlegum tónleikum á Íslandi þann 25. júní 2019.
„Ég hefði ekki getað óskað mér betri lokakafla, með svo mörgum sérstökum augnablikum sem ég mun varðveita að eilífu,“ sagði Taylor.
Félagar hans í hljómsveitinni, Simon Le Bon, Nick Rhodes og John Taylor (sem er ekki skyldur Roger Taylor), sögðu í færslu á samfélagsmiðlinum að trommuleikarinn hefði „átt þátt í að móta hljóm Duran Duran“.
„Við styðjum ákvörðun hans heils hugar og óskum honum heilsu og hamingju,“ sögðu tónlistarmennirnir.
„Hann verður alltaf hluti af þessari fjölskyldu.“
