Reiknað er með metfjölda gesta á fjölskylduhátíðina Eina með öllu á Akureyri um verslunarmannahelgina. Miðasala á stórtónleika á laugardagskvöld gengur vonum framar að sögn skipuleggjenda.
„Miðasala keyrist bara hærra og hærra og við erum að sjá töluvert betri tölur en í fyrra. Já þúsundir miða, ætli við förum ekki í tuginn jú. Við erum að vonast eftir því og á góðri leið með það,“ segir Halldór Kristinn Harðarson, einn af skipuleggjendum Einnar með öllu á Akureyri, sem hefur tvöfaldað gæsluna hjá sér miðað við fyrri ár. „Það var sett af stað forvarnarteymi. Það hefur unnið með lýðheilsusviði Akureyrarbæjar, barnavernd, foreldrum og flakkandi félagsmiðstöð. Við erum bara búnir að setja allt í gang,“ segir Halldór.
Virk á samfélagsmiðlum
Akureyrarbær hefur verið virkur á samfélagsmiðlum að undanförnu með alls kyns forvarnarauglýsingar fyrir komandi helgi. Formaður bæjarráðs segir mikilvægt að vera við öllu búin.
„Við höfum fundið það í umræðunni og heyrt útundan okkur það sé búist við miklum straumi og að straumurinn sé hingað norður um helgina. Sem er bara frábært. En þegar koma margir geta fylgt því alls konar vandamál. Við höfum verið að impra á því við foreldra að hafa svolítið augun á boltanum, hvað krakkarnir þeirra eru að gera og með hverjum og svoleiðis. Og að börn séu ekki að koma norður í leyfisleysi, krakkar undir 18. Þetta er ekki staður fyrir það, þetta er fjölskylduhátíð,“ segir Óðinn Svan Óðinsson, formaður bæjarráðs á Akureyri.
Hjalti Axelsson, aðstoðarvarðstjóri hjá Lögreglunni á Norðurlandi eystra, segir að lögreglan sé vel mönnuð fyrir komandi helgi og að mannskapur sé fjórfaldur á við venjulega helgi.
Miðasala á Þjóðhátíð tekur kipp
Þá má einnig búast við fjölda gesta til Vestmannaeyja. Sala á miðum á Þjóðhátíð hefur verið dræmari en undanfarin ár. Jónas Guðbjörn Jónsson, formaður Þjóðhatíðarnefndar, sagði í samtali við fréttastofu að miðasalan væri að taka við sér, og veðurspáin væri frábær. Hann ætti erfitt með að gera sér grein fyrir fjölda gesta sem ætluðu að leggja leið sína til Eyja um helgina.
Þjóðhátíð hefur verið áberandi í auglýsingum á liðnum vikum og í dag sást auglýsing um afslátt af helgarpassa í dalinn ef pantað er með afsláttarkóða. Aðspurður sagði Jónas að það væri bara til að minna á sig og fá miðasöluna til að taka kipp.
