Ekkert samráð var haft við sveitarfélagið Vesturbyggð þegar ákveðið var að ferjan Baldur, sem sinnir áætlunarsiglingum yfir Breiðafjörð, yrði fengin til að leysa af Vestmannaeyjaferjuna Herjólf næstu daga.
Þá var enginn fyrirvari á ákvörðuninni, sem hefur meðal annars haft þær afleiðingar að tveir starfsmenn Orkubús Vestfjarða eru nú strandaglópar í Flatey. Ekki liggur fyrir hvernig þeir komast til síns heima.
Gerður Björk Sveinsdóttir, bæjarstjóri Vesturbyggðar, segir óboðlegt að ákvarðanir sem varða samgöngur á svæðinu séu teknar án samráðs og fyrirvara.
„Við upplifum þetta sem mikla óvirðingu við okkar hagsmuni hér á þessu svæði, þar sem við stólum á Baldur sem okkar samgöngutæki. Þegar honum er kippt svona úr áætlun bara með engum fyrirvara þá náttúrulega hefur það áhrif á svæðinu,“ segir Gerður Björk.
Baldur er mikilvægur Vesturbyggð
Bæjarstjórinn segir engin samskipti hafa verið á milli Vesturbyggðar og Vegagerðarinnar áður en ákvörðunin var tekin.
„Við fengum tölvupóst í morgun frá Vegagerðinni en ekkert þegar þessi ákvörðun var tekin. Við eigum mjög erfitt með að skilja af hverju það þarf að taka þessa ákvörðun í svona miklum flýti og að það sé ekki hægt að ígrunda þetta og hafa samráð við okkur.“
Mikilvægi ferjunnar Baldurs sé mikið fyrir sveitarfélagið.
„Baldur náttúrulega siglir hérna yfir Breiðafjörðinn. Við búum við vegi sem eru í mjög bagalegu ástandi. Hérna eru miklir þungaflutningar. Nú eru leysingar á vegum og við erum að keyra að hluta til yfir malarvegi. Þetta hefur mikil áhrif á þá vegi, þegar við erum að keyra með þunga bíla yfir þá á þessum tíma árs.“
Þá bendir Gerður Björk á að verið sé að flytja fisk af Snæfellsnesi til vinnslu á Patreksfirði með Baldri. Það komi sér verulega illa að keyra Skógarströndina með fiskinn, sé það yfirhöfuð hægt.
Þá er óljóst hvernig starfsmenn Orkubús Vestfjarða sem strandaglópar eru í Flatey eiga að komast heim til sín.
„Þeir eru með bíl sinn staðsettan í Brjánslæk og það er ekkert í hendi með það að það sé hægt að fara með þá þangað. Það þarf þá mögulega að fara með þá á einhverri trillu til Stykkishólms. Það er ekki búið að leysa það, það er allavega það síðasta sem ég heyrði,“ segir Gerður Björk.
