Daði Már Kristófersson, fjármála- og efnahagsráðherra, ætlar að leggja til breytingar á lögum um laun þjóðkjörinna fulltrúa og embættismanna. Þær fela í sér varanlegt viðmið um uppfærslu launa þessa hóps og að laun hækki um 3,5 prósent í júlí í stað 9,7 prósenta eins og annars hefði gerst. Ríkisstjórnin hefur samþykkt framlagningu frumvarpsins.
Þessu er greint frá á vef Stjórnarráðsins.
Þar er haft eftir Kristrúnu Frostadóttur forsætisráðherra að lagabreytingin hafi í för með sér að launaþróun þjóðkjörinna fulltrúa og æðstu embættismanna taki betur mið af almennri þróun launa í landinu.
Kristrún vill meina að með hámarkshækkun launa um 3,5 prósent árin 2026–2028 verði skekkja sem myndaðist á síðustu árum leiðrétt. „Með þessu lagafrumvarpi setur ríkisstjórnin mikilvægt fordæmi,“ segir hún.
Haft er eftir Daða Má í tilkynningunni að mikilvægt sé að styðja við stöðugleika á vinnumarkaði og sýna ábyrgð á tímum verðbólgu og hárra vaxta.
Markmið frumvarpsins er sagt að skapa sátt um launafyrirkomulag kjörinna fulltrúa og æðstu embættismanna auk þess að skapa festu í uppfærslu launa þeirra.
