Kristrún Frostadóttir forsætisráðhera segist skilja að atvinnurekendur meðalstórra fyrirtækja séu mótfallnir aðild Íslands að Evrópusambandinu. Hún segir að í tiltölulega lokuðu hagkerfi eins og því íslenska, þar sem samkeppni er lítil, geti fyrirtækjunum vegnað ágætlega þrátt fyrir mikla verðólgu því þau geti velt kostnaðarhækkunum út í verðlag.
Þetta segir Kristrún í viðtali við Alistair Campbell og Rory Stewart í hlaðvarpinu Rest Is Politics, þegar hún er spurð að því hvers vegna atvinnulífið virðist vera mótfallið frekari aðildarviðræðum við ESB. Í hlaðvarpsviðtalinu ræddi Kristrún ítarlega um þjóðaratkvæðagreiðslu um áframhaldandi aðildarviðræður við Evrópusambandið.
Aukin samkeppni ekki endilega fyrirtækjunum í hag
Kristrún segir að það séu ekki endilega sömu skoðanir sem finnist innan lítilla og meðalstórra fyrirtækja og svo stærstu fyrirtækjanna.
„En stór hluti fyrirtækja hér á landi eru meðalstór. Þeim gengur ágætlega í lokuðu kerfi. Þeim getur vegnað vel þegar verðbólga eykst því það er takmörkuð samkeppni,“ segir Kristrún. Sömuleiðis geti mörg fyrirtæki gengið nokkurn veginn að sinni markaðshlutdeild vísri. „Ef þau fá utanaðkomandi samkeppni, þá er það kannski ekki svo frábært fyrir þau.“
Hún segir annað hljóð hafa verið í strokknum fyrir tíu til fimmtán árum þegar gjaldeyrishöft voru enn við lýði. Þá hafi atvinnulífið verið hlynnt aðild.
Krónan líklega stærsta málið
Kristrún segir stærsta málið í hugum fólks fyrir komandi þjóðaratkvæðagreiðslu líklegast vera íslensku krónuna og framtíð gjaldmiðlamála.
„Hún hefur verið tengd miklum sveiflum í gegnum tíðina en tekist hefur að hemja þær núna, hún kostar okkur samt gífurlega mikikð. Þetta eru háar fjárhæðir því við þurfum að hafa okkar eigin gjaldeyrisvaraforða. Svo heldur hún líka aftur af fyrirtækjunum.“
