Gert er ráð fyrir að Íslendingar muni alls eyða um 7,5 milljörðum króna í veðmál á netinu í tengslum við heimsmeistaramótið í knattspyrnu sem fram fer í Bandaríkjunum í sumar.
Þetta kemur fram í úttekt bandaríska fyrirtækisins Yield Sec, sem var unnin fyrir Happdrætti Háskóla Íslands. Ismail Vali, forstjóri Yield Sec segir að andvirði veðmálamarkaðarins á Íslandi sé metið á 51,8 milljarð króna í fyrra og 46,8 milljarða 2024.
„Þetta er markaður sem nálgast þrjú til fjögur hundruð milljarða dollara virði,“ segir Ismail Vali, forstjóri Yield Sec. „Ef þú setur þetta í samanburðarstærð þá er markaðurinn á Íslandi meira virði en í Alaska og Hawaii sameiginlega.“
Vali er staddur hér á landi til að funda meðal annars með dómsmálaráðuneytinu varðandi það hvernig hægt er koma frekari böndum á veðmálamarkaðinn og sjá til þess að sá hagnaður sem myndast vegna veðmála á netinu haldist hér á landi.
„Þú gætir unnið eitthvað með því að veðja á fótbolta en þú munt tapa peningunum annars staðar,“
Eins og áður segir er gert ráð fyrir að Íslendingar veðji fyrir um sjö og hálfan milljarð króna á HM í fótbolta í sumar og telur Ismail að mótið verði notað til þess að draga að mikinn fjölda nýrra viðskiptavina.
Veðmálasíður vilji fá fleiri notendur í viðskiðti í gegnum íþróttir til þess að geta boðið viðskiptavinum að taka þátt í spilavítum á netinu. Í veðmálum tengdum íþróttum græði síðurnar um 10 til 15% á veðmálum en í spilavítinu hækki það hlutfall upp í 50%.
„Þannig eru veðmálasíður í krosssölu þar sem þær fá þig inn í gegnum íþróttir og ýta þér áfram yfir í annað,“ segir hann.
„Þú gætir unnið eitthvað með því að veðja á fótbolta en þú munt tapa peningunum annars staðar,“ segir Vali sem tekur fram að Íslendingar séu sérstaklega móttækilegir þegar kemur að veðmálastarfsemi á netinu en um 60% landsmanna, þar með talin börn, hafi snert á löglegum eða ólöglegum veðmálum á netinu með einum eða öðrum hætti á síðasta ári. Þetta hlutfall sé yfirleitt í kringum 20 til 25% í öðrum löndum að meðaltali.
Skoða breytingu á veðmálamörkuðum
Spretthópur dómsmálaráðherra skoðar um þessar mundir kosti þess að taka upp blandað kerfi á happdrættismarkaði þar sem starfsleyfi verður veitt fyrir veðmálastarfsemi og spilavíti á netinu.
„Lögleiðing er kannski ekki rétta orðið yfir það sem við erum að skoða en við höfum verið að skoða útfærslu hinna Norðurlandanna, þar kemur í ljós að Ísland er töluverður eftirbátur og allir sem þekkja til, hvort sem það eru hagaðilar eða aðrir aðilar með innsýn í markaðinn, eru þessarar skoðunar, óbreytt staða er sú versta,“ segir Þorbjörg Sigríður Gunnlaugsdóttir dómsmálaráðherra.
Horfa til finnsku leiðarinnar
Horft er til hinnar svokölluðu finnsku leiðar sem var lögleidd í Finnlandi á þessu ári. Markaðurinn þar hefur verið opnaður að hluta með starfsleyfiskerfum fyrir veðmálastarfsemi og spilavíti á netinu. Ekki liggur fyrir hvenær spretthópurinn skilar niðurstöðum eða hvenær frumvarp um málið verður lagt fram.
Á Íslandi eru sex fyrirtæki með sérleyfi frá yfirvöldum til þess að reka happdrætti eða veðmálastarfsemi. Það eru Happdrætti Háskóla Íslands, Happdrætti DAS, Happdrætti SÍBS, Íslenskar getraunir, Íslensk getspá og Íslandsspil.
Þorbjörg segir að fulltrúar annarra ráðuneyta starfi í spretthópnum, þar á meðal frá heilbrigðisráðuneytinu, mennta- og barnamálaráðuneytinu og ráðuneyti háskólamála. Fundað hafi verið með öllum innlendum hagaðilum.
„Þannig að við erum enn þá í þessu samtali en mér hefur fundist gott að skynja að menn eru úr ólíkum áttum, allir að nálgast verkefnið af mikilli ábyrgð og mér heyrist að allir séu sammála um það að óbreytt staða sé óviðunandi,“ segir hún.
Erfitt að meta umfang ólöglegrar veðmálastarfsemi
Samkvæmt upplýsingum frá dómsmálaráðuneytinu er erfitt að meta með nákvæmum hætti umfang ólöglegrar veðmálastarfsemi hér á landi en þó safnar Hagstofa Íslands upplýsingum um notkun íslenskra greiðslukorta erlendis.
Samkvæmt þeim upplýsingum nam velta erlendra veðmálasíðna um 21,9 milljörðum króna árið 2025. Það er umtalsverð aukning á skömmum tíma en veltan var rétt um 18 milljarðar á árinu 2024 og um 13,2 milljarðar árið 2023. Vísbendingar eru um að upphæðirnar séu mun hærri ef velta erlendra greiðslukorta og rafmynta er tekin með.
