Norsk lögregluyfirvöld gerðu húsleit í höfuðstöðvum fjarskiptafélagsins Telenor, því stærsta í Noregi, vegna gruns um að fyrirtækið sé samsekt í glæpum herforingjastjórnar Mjanmar gegn mannkyni.
Viðskiptavinir dótturfélags Telenor í Mjanmar, TLM, lögsóttu móðurfélagið nýlega og sökuðu það um að láta herforingjastjórninni í té persónurekjanleg gögn um þá. Þeir telja að gögnin hafi verið notuð til þess að elta uppi, handtaka og dæma til fangelsis þá lýðræðissinna sem buðu herforingjastjórninni byrginn með mótmælum.
Tvær mismunandi lögreglustofnanir í Noregi, öryggislögreglan, PST, og rannsóknarlögreglan, Kripos, sem sérhæfir sig aðallega í skipulagðri glæpastarfsemi, voru með mál Telenor til rannsóknar.
Tímabilið sem er til rannsóknar er febrúarbyrjun 2021 til marsmánuðar árið 2022. Mjanmarski herinn rændi völdum 1. febrúar 2021 og steypti af stóli lýðræðislega kjörna forsætisráðherranum Aung San Suu Kyi og ráðuneyti hennar. Telenor seldi dótturfélagið TLM 25. mars ári síðar.
Telenor, sem norska ríkið fer enn með 54% hlut í, sendi frá sér tilkynningu í dag um að félagið væri í nánu samstarfi við rannsakendur í málinu. Það myndi gera allt til þess að aðstoða við að upplýsa málið að fullu.
Hópur aðgerðasinna í Mjanmar, Justice for Myanmar, sem fór fram á það í desember 2024 að Telenor yrði tekið til rannsóknar, fagnar því að „loksins“ hafi eitthvað þokast í málinu.
Í skriflegu svari til norska ríkisútvarpsins, NRK, segir yfirmaður upplýsingamála hjá Telenor, að félaginu hafi verið nauðugur einn sá kostur að fara í einu og öllu eftir skipunum herforingjastjórnarinnar þegar hún sölsaði undir sig völdin í Mjanmar.
„Valdaránið var hörmulegt fyrir íbúa Mjanmar, þar sem við upplifðum að vera sett í ómögulega stöðu með enga góða valkosti. Starfsfólk stóð frammi fyrir fangelsisvist, pyntingum eða dauðadómi ef skipunum herforingjastjórnarinnar var ekki hlýtt,“ segir David Fidjeland.
„Okkur fannst við ekki eiga annarra kosta völ og gátum ekki stofnað lífum starfsmanna okkar í hættu.“
