Hrafn Margeirsson segist algjörlega sannfærður um að 21 árs gömul dóttir hans hafi fengið túrbó-krabbamein í kjölfar bólusetningar við Covid. Hún lét lífið þremur mánuðum eftir að krabbameinið greindist. Hrafn, sem er nýjasti gesturinn í podcasti Sölva Tryggvasonar, segir andlát dóttur sinnar vera stærsta áfall lífs síns og hann vilji að þetta tímabil verði gert upp og sannleikurinn komi að endingu fram:

„Hún fékk tvær Pfizer sprautur í júní og júlí 2021. Hún var nýorðin 18 ára og hafði alltaf verið heilsuhraust og það amaði ekkert að heilsunni hennar. En hún fór fljótlega eftir bólusetningarnar að finna fyrir miklum frávikum á tíðarhring eins og þúsundir annarra kvenna. Hún hnígur síðan í tvígang niður í íþróttakeppni undan ofsafengnum bakverkjum, sem ekki fengust neinar skýringar á. Hún fer að finna fyrir kvíðaeinkennum og síðan fer að bera á lystarleysi og þyngdartapi og eitt rekur í raun annað. Þegar kemur fram á 2023 er hún orðin það máttfarin að hún er ekki lengur vinnufær. En hún fær bara verkjalyf eftir að hafa farið á heilsugæslu, en viku síðar er hún greind með magabólgur. En svo er hún hætt að geta gengið upp stiga og að endingu fer hún í rannsóknir í Reykjavík og þá kemur í ljós að hún er komin með krabbamein á lokastigi. Hún lifði svo ekki meira en þrjá mánuði eftir það."

Hrafn fór í þá vegferð að leita að svörum eftir andlát dóttur sinnar og segist hafa orðið sífellt sannfærðari eftir því sem hann kafaði dýpra. Hann segir enga sögu um krabbamein eða erfðafræðilega áhættuþætti hafa verið innan fjölskyldunnar og að framgangur sjúkdómsins hafi verið í meira lagi óvenjulegur:

„Ég sit í vinnunni 2-3 vikum eftir að hún greinist í lok vinnudags og er að fletta í gegnum norskan fjölmiðil og þar stendur bara skýrum stöfum að Covid-sprautur valdi krabbameini. Það er vitnað í rannsóknir frá fjölmörgum löndum í þessarri umfjöllun og ég man ennþá í hvaða stellingu ég var þegar ég las þetta. Þarna var hennar sjúkdómseinkennum og framhaldinu nánast lýst skref fyrir skref. Þó að ég sé efasemdamaður í grunninn gat ég eiginlega ekki annað en sannfærst um að þarna væri skýringin á veikindum hennar komin. Þetta var það sannfærandi að ég ákvað að fara í þá vegferð að kafa ofan í þetta. Hún fær ristilkrabbamein bara tvítug konan og það er nánast ekki þekkt. Þetta er yfirleitt eitthvað sem greinist hjá eldri karlmönnum og þróast mjög hægt. En hún lifði ekki nema í þrjá mánuði frá því að hún greindist og þangað til hún var látin. Ristilkrabbamein þróast yfirleitt hægt og er mun algengara hjá eldri einstaklingum, sérstaklega karlmönnum. Það er þekkt að fólk getur verið með slíkt krabbamein í meira en áratug áður en það uppgötvast. En þessi ofsahraði á krabbameini er einmitt einkennið á þessum túrbínu-krabbameinum sem hafa verið tengd við ákveðnar lotur af Covid-bólusetningunum."

Hrafn náði að afla sér upplýsinga um lotunúmer bóluefnanna hjá heilsugæslunni eftir að Landspítalinn vildi ekki afhenda honum upplýsingarnar. Hann segir erlendar rannsóknir sýna að í sömu lotunúmerum af bóluefnum og dóttir hans fékk hafi verið aðskotaefni eins og E. coli, saurgerlar og SV40 promoter:

„Þessar rannsóknir skipta nú þúsundum og það er augljóst að þessi lotunúmer innihéldu E. Coli og krabbameinsvakann SV40 promoter, sem er meðal annars notaður á tilraunastofum til að framkalla krabbamein í tilraunadýrum. Það lá mjög mikið á og peningahagsmunirnir voru gífurlegir. Þessi efni fundust ekki í fyrstu framleiðslulotunum sem voru framleiddar við aðrar aðstæður og meiri tími og yfirvegun gefin í framleiðsluna. Það voru framleiddir milljarðar skammta af bóluefnum á mettíma og það voru gríðarlegir hagsmunir undir. Í Danmörku eru um 80% af verstu tilfellum aukaverkana frá um 5% af lotunúmerum, þannig að það voru ekki öll bóluefnin eins."

Hrafn greinir í þættinum frá því þegar hann sótti Málþing á vegum Krabbameinsfélagsins þar sem Alma Möller heilbrigðisráðherra og fyrrverandi Landlæknir hafi verið frummælandi. Málþingið fjallaði um hvernig við getum minnkað líkurnar á að fá krabbamein. Eftir málþingið segist Hrafn hafa hitt Ölmu úti á bílastæði:

„Ég beið eftir henni fyrir utan húsið og gekk til hennar og kynnti mig og þakkaði fyrir erindið. Ég spurði hvort ég gæti átt við hana orð og hún sagði það alveg sjálfsagt og að hún væri ekki á neinni hraðferð. Ég tjáði henni að mér hefði samt þótt vanta í erindið hennar umfjöllun um umframdauðsföll sem hefðu átt sér stað á Íslandi frá Covid tímanum og nýgengi krabbameina á þessum sama tíma. Hún sagðist ekkert kannast við þessa aukningu krabbameina eða umframdauðsföll og þegar ég spurði hvort þetta gæti tengst covid-sprautunum fór hún nánast að hlæja. Hún fullyrti að bóluefnin hefðu verið virkilega örugg og farsæl og sagði að ég væri á algjörum villigötum. Þegar ég spurði hana hvers vegna hún hafði þá komið í veg fyrir að tengdamóðir sín yrði sprautuð með efninu á hjúkrunarheimilinu Sóltúni í lok árs 2020 varð hún alveg brjáluð. Hún gjörsamlega sleppti sér. Hún studdist við hækju á þessum tíma einhverra hluta vegna og ég hélt að hún ætlaði að leggja til mín með hækjunni. Hún var það reið. Hún sagðist ekki ræða heilsufar tengdamóður sinnar við ókunnuga, en í næstu setningu sagði hún nú samt að tengdamóðir sín hefði á endanum fengið sprautu. Ég spurði hana þá í mestu rólegheitum hvort að hún vildi ræða aukaverkanir eftir covid-sprautur almennt alveg óháð tengdamóður hennar, en þá skyndilega lá henni mikið á að komast í burtu."

Hrafn segist vera kominn á þann stað að hann hafi engu að tapa og honum gangi það eitt til að sannleikurinn komi fram:

„Mér er alveg sama þó að ég sé fordæmdur fyrir að tala um þessa hluti, en ég vil bara að sannleikurinn komi fram. Markaðsrannsóknarfyrirtækið Maskína gerði rannsókn í sumar þar sem niðurstöðurnar benda til þess að á milli 20-30 þúsund Íslendingar telja sig hafa orðið fyrir alvarlegum skaða af völdum þessarra efna. Þetta er enginn smáfjöldi. Þegar þú ferð inn á vef lyfjastofnunar, þá eru tilkynningar um aukaverkanir af völdum þessarra lyfja á sjöunda þúsund og 43 dauðsföll tilkynnt. Það var að vísu hætt að skrá þar árið 2022. En við verðum að spyrja hver andskotinn sé um að vera. Ég geri mér þá von að með fyllingu tímans verði einhvers konar uppgjör á þessum tíma. Þetta er lengra komið í öðrum löndum en á Íslandi. Að sjálfsögðu er það sem rekur mig áfram minning dóttur minnar. Þetta er stærsta áfall lífsins og fylgir manni það sem eftir er."

Hægt er að nálgast viðtalið við Hrafn og öll viðtöl og podköst Sölva Tryggvasonar inni á solvitryggva.is