Arngrímur Guðmundsson, yfirlögregluþjónn og sviðsstjóri alþjóðalandamærasviðs, kannast ekki við að viðlíka tæknileg vandræði hafi komið upp hér á landi í tengslum við Entry Exit-landamærakerfið (EES) líkt og gerst hefur í öðrum Evrópulöndum.
Margra klukkutíma langar raðir hafa myndast á flugvöllum víða í Evrópu og var Evrópusambandið hvatt af hagsmunasamtökum til að taka kerfið úr sambandi yfir háannatímann í júlí og ágúst.
Ursula von der Leyen, forseti framkvæmdastjórnar Evrópusambandsins, sagði í gær að tæknilegir örðugleikar í tengslum við kerfið hefðu valdið töfum. Unnið væri með aðildarríkjum að viðgerðum.
Arngrímur segir það sama ekki gilda um tenginguna hér en vissulega sé flókið að taka upp kerfi líkt og EES. Tæknileg vandræði hafi vissulega komið upp.
„Það er náttúrulega verið að innleiða stórt og mikið kerfi og í þessum samræmdu landamærakerfum þá tekur afgreiðsla lengri tíma,“ segir Arngrímur.
„Það er verið að samkeyra öll gögn á sama tíma og fært er inn á landamærunum við miðlæg kerfi landamærastofnanna Evrópu, en það hafa ekki verið neinar stórar tæknilegar áskoranir hjá okkur hér á Íslandi ekki miðað við það sem maður heyrir í fréttum erlendis frá,“ segir hann.
Kerfið að fullu innleitt í apríl
Innleiðing á kerfinu hófst í október á síðasta ári og var kerfið að fullu innleitt í apríl. Arngrímur segir að ráðist hafi verið í mikla innviðauppbyggingu á sama tíma. Þar megi nefna nýjan landamærasal á Keflavíkurflugvelli, farþegamiðstöðina Vör í Reykjavík fyrir skemmtiferðaskip ásamt uppbyggingu á Akureyrarflugvelli. Tafir á Keflavíkurflugvelli undanfarið eigi sér fleiri skýringar.
„Það eru svo margir þættir sem geta spilað þar inn í, það er meðal annars þéttni í komum á flugvélum,“ segir Arngrímur. „Vélar koma seinna inn og þá kannski safnast meiri massi af farþegum á skemmri tíma inn í salinn og þá verða einhverjar raðir í einhvern smá tíma og svo leysist það.“
