Tvær sprengjur voru sprengdar í Damaskus á meðan Macron Frakklandsforseti var þar í heimsókn 7. júlí , fyrstur evrópskra leiðtoga frá því að uppreisnarsveitir steyptu Bashar al-Assad forseta af stóli í desember 2024 og Ahmed al-Sharaa tók þar völdin í framhaldinu.
Átján manns særðust í sprengingunum, sem urðu ekki ýkja fjarri hótelinu sem Macron bjó á. Fyrr í mánuðinum fórust níu manns þegar sprengja var sprengd á kaffihúsi í borginni. Þessar árásir koma á versta tíma og stofna brothættum friðinum sem ríkt hefur í landinu undanfarin misseri í voða.
Eins konar friður eftir margra ára blóðugt borgarastríð
Landið var í algjörri upplausn þegar al-Sharaa tókst að sameina margar og ólíkar uppreisnarhreyfingar í allsherjarsókn gegn her Assad-stjórnarinnar og taka völdin. Þetta tókst honum eftir margra ára borgarastríð þar sem fjölmargir utanaðkomandi aðilar lögðu sitt af mörkum til að draga stríðið á langinn, kynda ófriðarbálið og viðhalda og auka enn á sundrungu í landi þar sem hver byssan var upp á móti annarri.
Þar má nefna Rússa, Írana og hinar ýmsu vopnuðu, sýrlensku sveitir sem þeir fjármögnuðu, vopnuðu og studdu, að ógleymdum ISIS, Tyrkjum, Bandaríkjamönnum og svo erkióvininum, Ísrael.
Yfir 650.000 manns féllu í borgarastríðinu, þar af hátt á þriðja hundrað þúsund almennra borgara. Rúmlega 13 milljónir Sýrlendinga lögðu á flótta, 6,7 milljónir innan landamæra Sýrlands og nánast jafnmargir til annarra landa.
Markmiðið að koma á „eðlilegu ástandi“
Stjórnvöld reyna að koma á einhverju sem líkist eðlilegu ástandi. Koma atvinnu- og efnahagslífinu aftur í gang, jafnvel ferðaþjónustunni, sem var mikilvægur atvinnuvegur í Sýrlandi áður en borgarastríðið braust þar út í mars 2011, sannfæra flóttafólk um að óhætt sé að snúa aftur heim og laða til sín erlenda fjárfesta. Sprengjuárásir eins og þær sem greint er frá hér að ofan eru sérlega vel til þess fallnar að spilla öllum slíkum áformum.
Leiðtogi illræmdra uppreisnarmanna verður forseti og mannasættir
Al- Sharaa er sunní-múslími, fæddur í Sádí Arabíu og var leiðtogi hinnar illræmdu uppreisnarhreyfingar al-Nusra, sem talin er hafa framið ófáa stríðsglæpi gegn almennum borgurum í borgarastríðinu. Þrátt fyrir það tókst honum að ná stjórn á nær öllu Sýrlandi - og halda henni, sem er meira en flestir bjuggust við þegar hann tók formlega við forsetaembættinu í janúarlok 2025.
Magnea Marínósdóttir alþjóðastjórnmálafræðingur segir merkilegt hvernig honum tókst að sameina margar og ólíkar uppreisnarsveitir og -hreyfingar í aðdraganda stórsóknarinnar sem að lokum leiddi til falls Assads og stjórnar hans í lok árs 2024. Hún segir að svo virðist sem hann noti núna þessa sömu herkænsku og diplómatísku eiginleika sem hann búi yfir í viðleitni sinni við að koma á pólitískum stöðugleika og treysta völd ríkisstjórnarinnar yfir öllu landinu.
Rætt var við Magneu í Speglinum um stöðuna í Sýrlandi og aðstæður almennings þar, rúmu hálfu öðru ári eftir að borgarastyrjölinni lauk.
Hlusta má á viðtalið í spilaranum hér að neðan.
