Kristrún Frostadóttir forsætisráðherra og Þorgerður Katrín Gunnarsdóttir utanríkisráðherra segja alvarlegt að Donald Trump Bandaríkjaforseti hafi deilt mynd þar sem Bandaríkjafáni var látinn hylja Ísland, Kanada, Grænland og fleiri ríki. Þær sögðu þetta móðgun og lélegt grín.
Lélegt grín
„Það var ástæða til þess að kalla sendiherrann á fund og setja fram alveg skýr skilaboð af okkar hálfu að þetta var algjörlega óviðunandi. Mér hefur verið bent á ítrekað innan úr bandarískri stjórnsýslu að við eigum kannski ekki að taka núverandi Bandaríkjaforseta bókstaflega en við eigum að taka hann alvarlega. Það er nákvæmlega það sem við erum að gera og undirstrika að Ísland er fullvalda, það er sjálfstætt ríki sem ber ábyrgð á sínum örlögum sjálft. Það eru ekki aðrir sem geta möndlað eða höndlað með okkar sjálfstæði eða fullveldi. Við gerum það á okkar forsendum. Við gerum það hér heima og við gerum það saman.“
Þorgerður Katrín undirstrikaði að Íslendingar myndu áfram standa með Grænlendingum og ekki tala lágt í þeim efnum.
Hún sagðist hlakka til að vinna áfram að sameiginlegum verkefnum með Bandaríkjunum, svo sem á sviði viðskipta og varnarmála.
„En það er alveg ljóst að þetta er grundvallarprinsipp. Þetta er ekki grín að mínu mati og ef þetta á að vera grín þá er þetta lélegt grín.“
Móðgun við Íslendinga, Kanadamenn og Grænlendinga
Kristrún Frostadóttir forsætisráðherra tók undir með henni.
„Að mínu mati er sá undirtónn sem þarna heyrist fáránlegur. Þetta er móðgun við Íslendinga, Kanadamenn, Grænlendinga að tjá sig með þessum hætti. Við eigum bara að vera skýr þegar kemur að því. Það er ekkert fyndið eða eðlilegt að gera grín að fullveldi ríkja, sérstaklega í dag þegar það er ekki sjálfgefið.“
Kristrún sagði Íslendinga þó ekki hafa fundið fyrir því í samskiptum við Bandaríkjamenn að vandamál væru til staðar.
Hún sagði að taka ætti þetta alvarlega.
„Þetta er ekki léttvægt mál í mínum huga og í huga ríkisstjórnarinnar,“ sagði Þorgerður Katrín. „Þetta er ekki þannig að þú getir sett út, sama hver þú ert, skilaboð eða fullyrðingar eða myndbirtingar sem ýja að einhverju öðru en því að virða sjálfstæði og fullveldi þjóða.“
